KF Shiroka është padiskutim ekipi që po spikat më shumë në merkaton verore të Kategorisë së Tretë. Me qetësi dhe pa shumë zhurmë e bujë, presidenti Ergi Axhani, falë edhe një përvoje dhe tradite sportive familjare, kur kemi parasysh edhe prindërit e tij, Hava dhe Fatmir Axhani, i pari me një karrierë të pasur me Vllazninë dhe e ëma, krahas sporteve të tjerë, ka bërë histori si trajnere e futbollit femra, i ka vënë vetes detyrë që këtë skuadër të ngritur nga zero ta çojë në nivele të larta sportive.
Nëse, sezonin e kaluar, nuk arriti të realizojë objektivin e kalimit në Kategorinë e Dytë, kjo edhe për faktor të ndryshëm, mes të cilëve edhe çështje gjykimi, këtë sezon të ri futbollistik 2025-2026, i ka vënë vetes detyrë ta realizojë objektivin kategori e dytë.
Dhe, një gjë e tillë dallohet qartë edhe në merkaton e studiuar dhe tejet të kujdesshme që po realizon, ku hapin e parë të ndërtimit të skuadrës së re e nisi duke piketuar stafin e ri teknik. Pas drejtorit sportiv, Matias Tatanxhelo dhe trajnerit të parë, Ardit Mani, vijoi me prezantimin e futbollistëve të njohur dhe me një karriere të pasur sportive në vite, duke nisur nga Klejdi Dibra, një nga shtyllat kryesore të Besëlidhjes në vite, ish futbollistët e Vllaznisë dhe të disa skuadrave në vazhdim, Samet Ruqi, Anderson Filipi, Oltion Drabeja që luan edhe detyrën e zëvendës trajnerit, ndërkohë që firmosja e radhës, është me Erjon Vucajn.
Ky i fundit, ka me të vertet një karrierë mbresëlënëse, duke nisur nga Vllaznia dhe disa skuadra të kategorisë superiore të Shqipërisë, Kosovës dhe Malit të Zi, e më gjërë, duke mos përjashtuar këtu edhe përvojën pozitive me ekipin kombëtar U21 dhe atë U19 më heret.
Nga sa bëhet e ditur, në listën e merkatos së presidentit Ergi Axhani, janë edhe emra të tjerë futbollistësh cilësor, kryesisht shkodranë, të cilët për momentin aktivizohen në ekipet e ndryshme të futbollit shqiptar, apo jashtë vendit, me të cilët është rënë dakord që të veshin fanelen e KF Shirokës.
