Për trajnerin e Laçit, Shpëtim Duro, cili do qoftë rezultati i ndeshjes së sotme me Vllazninë, sezoni ka qenë i suksesshëm për skuadrën e tij. Në intervistën e dhënë për “Panorama Sport”, trajneri i skuadrës kurbinase pohon se të katërta ekipet e kreut e meritojnë titullin, por më shumë Laçi, pasi ka qenë superior në përballjet direkte me 3 rivalët e tjerë. Sipas Duros, të katërta ekipet e kreut matematikisht kanë shanse për titullin në javën e fundit, por e pranon se Teuta dhe Vllaznia janë më të avantazhuara. Në fund Shpëtim Duro flet sërish për vazhdimësinë, ku nëse do të gjendet gjuha e përbashkët me presidentin Laska, pa dyshim dëshira është që të vijojë drejtimin e Laçit.
Për çfarë luan Laçi në Shkodër?
Sigurisht që është java e fundit dhe Laçi luan ashtu siç luajnë edhe tri skuadrat e tjera kryesuese, Vllaznia, Teuta dhe Partizani. Pra, matematikisht të katërta skuadrat janë në luftë për titullin kampion, pavarësisht se Teuta dhe Vllaznia janë pak më të favorizuara.
Vllaznisë i duhet një fitore me disa gola diferencë për të shpresuar titullin, ndërsa Laçit i duhet një mrekulli kombinimesh rezultatesh. Cili variant është më i realizueshëm?
Këto janë kombinacione në letër, por e rëndësishme është që të katërta skuadrat e para të Superiores janë në garë. Kjo është një e veçantë e kampionatit që në javën e fundit nuk është përcaktuar çështja e titullit. Të shikojmë si do të zhvillohen situatat dhe a do të vazhdojnë surprizat deri në javën e fundit, sikurse ka pasur gjatë gjithë kampionatit.
A e keni të plotë ekipin apo keni mangësi për transfertën e Shkodrës?
Ekipi është i plotë, nuk kemi mangësi për Vllazninë. E vetmja mungesë është ajo e mbrojtësit Obanor, që pësoi një dëmtim në ndeshjen e fundit me Teutën.
Është kjo renditje reale për kreun apo duhet të ishte ndryshe?
Sigurisht që katër skuadrat e para e kanë merituar titullin kampion, sepse gjatë gjithë kampionatit kanë qenë në garë, si Laçi, Partizani, Vllaznia dhe Teuta. Në respekt të skuadrës sime, titullin e meritonte Laçi duke pasur parasysh se jemi superiorë në përballjet direkte me 3 skuadrat e tjera kryesuese. Duke qenë superior në duelet direkte kam të drejtën të them se edhe ne si Laç e meritonim të ishim kampion në këtë sezon. Pas nesh, patjetër që gjithnjë e kam thënë se Vllaznia e meriton të jetë kampione, pasi ka bërë më mirë në këtë kampionat duke kryesuar për shumë javë, kryesisht në dy fazat e para që ishte lider i Superiores.
A keni biseduar me drejtuesit për të ardhmen?
Fillimisht duhet të mbarojmë ndeshjen e fundit të kampionatit. Shpresoj që të gjemë gjuhën e përbashkët me presidentin për edicionin e ardhshëm. Sigurisht, nëse biem në emërues të përbashkët për shumë probleme të skuadrës. E rëndësishme është se ky sezon ka qenë i jashtëzakonshëm për Laçin, duke pasur parasysh që ekipi po lufton deri në momentet e fundit për titullin kampion. Njëkohësisht kemi arritur një objektiv, pjesëmarrjen në Kupat e Europës, që pa dyshim që është një arritje e madhe, duke ditur se skuadra me investime kolosale si Tirana dhe Kukësi mbeten jashtë çdo objektivi të mundshëm këtë sezon.
ILIR CARA
