Me sfidën Dinamo City – Egnatia, e luajtur mbrëmjen e së dielës në “Air Albania”, uli siparin e javës së 16-të të kampionatit “Abissnet Superiore”.
Kampionët në fuqi të Egnatias fituan me rezultatin 2-1.
Vllaznia barazoi në “Loro Boriçi” 1-1 me Bylisin, ndërsa me të njëjtin rezultat u mbyll edhe përballja Teuta – Tirana në “Niko Dovana”.
Partizani regjistroi fitoren e tretë radhazi në kampionat, duke mposhtur Flamurtarin në shtëpi me rezultatin 2-1.
AF Elbasani triumfoi 1-0 ndaj Vorës në “Elbasan Arena” dhe kryeson kampionatin me 32 pikë, i ndjekur nga Egnatia me 32, Dinamo dhe Vllaznia me nga 26. Katërshën e parë finalist e kërcënon dyshja Teuta, Partizani, të cilët renditen vetëm 3 dhe 4 pikë jashtë zonës së katërshes finaliste të “Final 4”.
Ndërkohë, dy skuadrat që mbyllin renditjen janë Flamurtari dhe Tirana, të cilët respektivisht me 13 dhe 8 pikë, për momentin figurojnë në zonën e rënies nga kategoria Superiore.
