Departamenti i Edukimit në Federatën e Futbollit të Kosovës ka nisur sot realizimin e kursit të tretë për trajnerë për Licencën A të UEFA-s.
Në këtë kurs po marrin pjesë 23 kandidatë, në mesin e të cilëve edhe një trajnere, ndërsa pjesë e gjeneratës së re janë edhe ish-futbollisti i Kombëtares së Kosovës, Herolind Shala, si dhe disa emra të njohur të futbollit vendor.
Përveç ligjëratave teorike, kandidatët do të angazhohen edhe në punë praktike si dhe monitorime në klube përgjatë gjashtë muajve të ardhshëm, ndërsa në përfundim të programit do t’i nënshtrohen provimit final. Trajnerët që i përmbushin me sukses të gjitha kriteret dhe e kalojnë në fund testin do të pajisen me Licencën A të UEFA-s.
