Vllaznia ka marrë një fitore të rëndësishme në shtëpi përballë Elbasanit, në takimin e javës së 24-t të “Abissnet Superiore”, duke triumfuar me rezultatin 2-1 në stadiumin “Loro Boriçi”.
Shkodranët e nisën sfidën me intensitet dhe e gjetën avantazhin në minutën e 24-t, kur Bekim Balaj shfrytëzoi si duhet një rast brenda zonës dhe dërgoi topin në rrjetë, duke ndezur festën në tribunat kuqeblu.
Elbasani reagoi vonë, por me efikasitet. Në minutën e 80-të ishte Boye që riktheu baraspeshën, duke i dhënë tjetër rrjedhë ndeshjes dhe duke shtuar tensionin në minutat e fundit.
Kur u duk se sfida do të mbyllej në barazim, Vllaznia gjeti forcën për goditjen përfundimtare. Kevin Dodaj realizoi golin e fitores, duke i dhënë tre pikë me peshë skuadrës së tij dhe duke e bërë edhe më të veçantë mbrëmjen e 107-vjetorit të klubit shkodran.
Me këtë sukses, skuadra e drejtuar nga Edi Martini blindon vendin e parë me 48 pikë, duke krijuar një diferencë prej pesë pikësh nga Egnatia. Në anën tjetër, Elbasani mbetet në vendin e tretë me 42 pikë, duke mos përfituar nga përballja direkte për të ngushtuar diferencat në krye.
