Në “Shtëpinë e Futbollit” në Tiranë u zhvilluan ndeshjet gjysmëfinale dhe finalja e “Turneut të Përfaqësueseve Rajonale Vajza” për grupmoshat 2012, 2013 dhe 2014, një aktivitet i organizuar nga Federata e Futbollit në kuadër të programit të zhvillimit të futbollit të vajzave.
Finalistet e Grupeve A dhe B dhuruan ndeshje shumë të bukura, me rivalitet sportiv, ritëm dhe entuziazëm në fushë. Të gjitha ekipet treguan përkushtim maksimal gjatë takimeve, ndërsa atmosfera pozitive dhe energjia e vajzave e kthyen këtë aktivitet në një festë të vërtetë të futbollit.
Në gjysmëfinalen e parë, Përfaqësuesja Rajonale e Fierit triumfoi 3-1 ndaj Korçës, ndërsa Tirana fitoi 2-0 përballë Elbasanit në gjysmëfinalen e dytë.
Rezultatet:
Gjysmëfinale 1: Fieri-Korça 3-1
Gjysmëfinale 2: Tirana-Elbasani 2-0
Në ndeshjen për vendin e tretë, Elbasani mposhti Korçën me rezultatin minimal 1-0, duke siguruar vendin e tretë në turne.
Ndeshja për vendin 3/4:
Korça-Elbasani 0-1
Finalja mes Tiranës dhe Fierit ishte spektakolare dhe shumë e luftuar deri në fund. Përfaqësuesja Rajonale e Tiranës arriti të fitojë me rezultatin 3-2, duke u shpallur kampione e turneut.
Finalja:
Tirana-Fieri 3-2
Renditja përfundimtare:
Vendi i parë: Tirana
Vendi i dytë: Fieri
Vendi i tretë: Elbasani
Vendi i katërt: Korça
Ky turne ishte një tjetër hap i rëndësishëm në promovimin dhe zhvillimin e futbollit të vajzave në Shqipëri, duke i dhënë mundësi talenteve të reja të tregojnë potencialin e tyre dhe të fitojnë eksperiencë konkurruese në një ambient profesional dhe motivues.
