Besëlidhja-Besa 2-1(Shënues: Olamide 20′, Bilali 45’/Prengaj 79′)
Kartonë të verdhë:Fetaj 45+1′,Topallaj 46′,Smaçi 49′,Molla 65’/Prengaj 40′,Rrena 50′,Danladi 53′
Besëlidhja:Molla,Topallaj,Janku,Bilali(A.Marku 71′),Alidema(Trashi 59′),Smaci(Hila 57′),Fetaj,Zabala,Shyti(Fusha 71′),Olamide,Osikel Trajner:Ndriçim Shtubina
Besa:Dema,Daja(Kofi 46′),Kapo,Prengaj,Ruzgis,Zekolli(Topi 66′),Marku(Danladi 46′),Guhacaj(Rrena 46′),Abdulai,Danaj(Syla 66′),Spahiu Trajner:Gugash Magani
Gjyqtarë:Albano Stolaj,Xhuljo Mani(Tiranë),Edlir Malo(Lushnje),Ardit Merdanaj(Vlorë) Delegat:Mario Kërtusha(Durrës) Vëzhgues:Gjergji Selala(Laç)
Besëlidhja ka marrë një fitore të rëndësishme në shtëpi duke mposhtur Besën kryesuese me rezultatin 2-1 në një takim të luftuar dhe me raste në të dyja portat.
Skuadra lezhjane e drejtuar nga Ndriçim Shtubina u tregua më efikase në pjesën e parë.
Besa krijoi disa mundësi të mira me Prengaj, Ruzgis, Guhacaj, Spahiu dhe Daja por herë ndërhyrjet e portierit Molla dhe herë mungesa e saktësisë në finalizim bënë që miqtë të mos arrinin të gjenin rrugën e rrjetës.
Në krahun tjetër Besëlidhja shfrytëzoi shumë më mirë rastet e saj.
Në minutën e 20-të ishte Olamide që zhbllokoi rezultatin dhe kaloi vendasit në avantazh.
Besa kërkoi të reagonte dhe vazhdoi të ushtronte presion në drejtim të portës lezhjane por pa arritur të konkretizonte.
Goditja e dytë për miqtë erdhi pikërisht në fundin e pjesës së parë. Në minutën e 45-të Bilali realizoi golin e 2-0 duke i dhënë Besëlidhjes një avantazh të rëndësishëm përpara pushimit.
Vendasit patën edhe mundësi të tjera me dy autorët e golave por pa arritur ta thellonin më tej rezultatin.
Në pjesën e dytë Besa u detyrua të rrezikonte më shumë në kërkim të rikthimit në ndeshje.
Kavajasit shtuan prezencën në gjysmëfushën kundërshtare dhe kërkuan me insistim golin që do t’i rikthente në lojë.
Përpjekjet e Besës u shpërblyen në minutën e 79-të teksa ishte Prengaj që arriti të mposhtte Mollën dhe ngushtoi diferencën në 2-1 duke i dhënë një tjetër ritëm minutave të fundit të takimit.
Pas golit miqtë hodhën më shumë forca përpara dhe kërkuan barazimin ndërsa Besëlidhja u përpoq të administronte avantazhin dhe të mbronte rezultatin.
Lezhjanët ia dolën të përballonin presionin deri në vërshëllimën përfundimtare dhe siguruan tri pikë me shumë vlerë.
Një fitore kjo e merituar për Besëlidhjen, ku pas barazimit me Bylisin në transfertë shkon në kuotën e katër pikëve duke nisur kështu ngjitjen në tabelë, pasi dy humbjet e para me Kukësin dhe Korabin bënë që ta nisnin kampionatin nga fund ii tabelës së klasifikimit.
Fatos LAMAJ
