AS Roma – Feynoord, është finalja e madhe e UEFA Europa Conference League, që do të luhet në “Air Albania” të Tiranës më datë 25 maj. Një finale e cila po pritet me shumë interesim nga opinioni sportiv, jo vetëm në kampet respektive të të dy klubve, por në rang ndërkombëtar.
Kërkesa për ta shijuar live nga triburat e stadiumit kombëtar të Tiranës këtë supersfidë ka bërë që interesimi për të patur një biletë për këtë ndeshje të jetë shumë i madh.
Pikërisht, në lidhje me biletat, përmes një njoftimi të institucionit të UEFA-s është bërë e ditur mesditën e sotme, se ka nisur shitja e tyre për publikun.
“Nisin shitjet për biletat e finales së UEFA Conference League, @officialasroma – @feyenoord
UEFA njofton të gjithë të interesuarit se është hapur procesi i shitjes së biletave për ndeshjen finale të UEFA Europa Conference League, AS Roma – Feynoord, që do të luhet në “Air Albania” të Tiranës më datë 25 maj 2022.
Të gjithë tifozët që kanë hapur një llogari në faqen e UEFA-s dhe kanë marrë një e-mail sot nga UEFA me linkun përkatës mund të hyjnë dhe të aplikojnë për të blerë bileta.
Bëhet fjalë për biletat që janë në shitje për publikun e përgjithshëm dhe që janë nxjerrë sot në shitje nga UEFA.
Duke qenë se përzgjedhja e atyre që mund të blejnë bileta do të jetë përmes shorteut, UEFA u bën thirrje të gjithë atyre që kanë aplikuar të nxitojnë për të përfituar nga mundësia.”, thuhet në njoftimin në fjalë.
