Me datë 12 janar 2021 Sektori i Garave në FSHF doli me një vendim zyrtar për të shtyrë startin e kampionateve kombëtare të futbollit për kategorinë e parë dhe të dytë pa afat të caktuar. Shkaku ishte moti i keq shoqëruar me reshje të dendura shiu që pati përfshirë territorin shqiptar gjatë ditëve të para të vitit 2021, të cilat dhanë ndikimin negativ në përmbytjen e pjesës më të madhe të fushave sportive të stervitjes por edhe të stadiumeve ku do të zhvilloheshin ndeshjet zyrtare.
…Ndërkohë kur kjo javë pritej të shoqërohej me fillimin e aktivitetit zyrtar të këtyre dy kategorive, vjen një tjetër informacion zyrtar nga FSHF duke bërë të ditur se Kampionati Kombëtar i futbollit për kategorinë e parë dhe të dytë do të shtyhet përsëri. Dhe, arsyeja ka të bëjë përsëri me kushtet e motit.
“Federata Shqiptare e Futbollit bën me dije se rifillimi i aktivitetit të Kategorisë së Parë dhe Kategorisë së Dytë do të shtyhet sërish. Zyra e shtypit në FSHF njofton se vendimi është marrë për shkak të reshjeve të shiut, që parashikohen në fundjavë e që mund të krijojnë problematika të mëdha në infrastrukturën e shumë skuadrave. Në këto kushte, Sektori i Garave në FSHF ka planifikuar që rifillimi i ndeshjeve në të dyja kategoritë të ndodhë fundjavën pasardhëse, më konkretisht 6 shkurt 2021. Ndërkohë, lidhur me këtë ndryshim të kalendarit janë njoftuar edhe klubet e Kategorisë së Parë dhe Kategorisë së Dytë”, thuhet në njoftimin e Federatës Shqiptare të Futbollit.