Akoma nuk është mbushur viti i formimit të KF Murlani dhe sukseset e ekipeve të këtij klubi tashmë janë prezente në aktivitetin futbollistik shqiptar. Me një skemë të mirëfilltë funksionimi duke filluar me ekipet e moshave nga 9 deri në 19 vjeç për të vijuar edhe me dy ekipet e të rriturve, femra dhe meshkuj, bilanci i konkurimit në Kampionatet Kombëtare dhe ato Rajonale të KF Murlani, është shumë pozitiv.
Pa anashkaluar arritjet e skuadrave të tjera të këtij klubi, momenti më i prekshëm për opinionin sportin shkodran dhe më gjerë, është prezenca e skuadrës së parë të të rriturve, e cila nën drejtimin e trajnerit Altin Xhahysa, e cila po shkon drejt realizimit të objektivit të marrë, kualifikimin në Kategorinë e Dytë.
Momenti historik duket se po mbërrin. Kur kanë mbetur edhe dy javë nga mbyllja e kampionatit, KF Murlani është në vendin e dytë pas Luftëtarit kryesues. Të enjten, në orën 12.30, murlanasit do të përballen në fushën e Kompleksit Sportiv Kamëz me KF Spartak. Një fitore e djemve të drejtuar nga trajneri Altin Xhahysa, siguron të drejtën e kalimit në Kategorinë e Dytë një javë përpara përfundimit të kampionatit.
Në pritje të 90-të minutëshit përcaktues të realizimit të objektivit, murlanasit po përgatiten intensivisht në fushën sportive të Barbullushit. Fitorja e javës së kaluar me FK Drinin me rezultatin 5 me 0 falë të dygolëshit të Markelian Gurit, dhe nga një të Vildan Kaqubeles, Senad Lekajt dhe Sabian Krajes e ka rritur akoma më shumë adrenalinën në gjirin e skuadrës. Ndërkohë, ashtu si edhe më herët, skuadra vazhdon të ketë pranë edhe përkujdesjen e presidencës “Rraboshta”, e cila për të motivuar grupin drejt suksesit të mirëpritur ka rezervuar një premio speciale për futbollistët dhe stafin teknik.
