Kombëtarja e Shqipërisë në Futsall e drejtuar nga trajneri Erind Resuli ka marrë fitoren e parë në kuadër të ndeshjeve të vlefshme për Eliminatoret e Kampionatit Europian 2022 të Futsallit. Në përballjen me kombëtaren e Danimarkës, takim ky që u luajt të enjten në sallën e Parkut Olimpik të Tiranës kuqzinjtë tanë fituan me rezultatin 2-3.
Ka qenë një ndeshje shumë e luftuar nga të dyja skuadrat, me një pjesë të parë që foli vetëm shqip, me disa raste shumë të mira për t’u shënuar, dy prej të cilave u kthyen në gol.
Goli i parë për kuqezinjtë tanë shënohet nga Selmanaj në minutën e 10-të të takimit. 2 minuta më vonë, është Halimi i cili dyfishon rezultatin, duke i dërguar shifrat 0-2 në favor të kuqezinjve. Në fraksionin e dytë të ndeshjes, në minutën e 29-të, Selmanaj shkund sërish rrjetën e danezëve, duke trefishuar rezultatin për Shqipërinë.
Nga ana tjetër, në minutën e 33-të, janë danezët që shënojnë duke shkurtuar rezultatin me Falck, ndërsa shtatë minuta më vonë është Hansen, ai i cili dyfishon shifrat për Danimarkën, por pa ndryshuar fatin e lojës, sepse Shqipëria e fiton të gjithë ndeshjen me rezultatin 2 me 3.
Ndeshja në fjalë në fakt duhej të luhej në Danimarkë, por u luajt në Shqipëri, pas vendimit të marrë në konsultat e vazhdueshme me UEFA-n, Federatën Daneze të Futbollit dhe Federatën Shqiptare të Futbollit, për shkak të masave kufizuese të përcaktuara nga autoritetet shtetërore daneze për parandalimin e përhapjes së Covid-19, si edhe karantinës së detyruar për të gjithë personat që hyjnë në Danimarkë.
Kombëtarja e Shqipërisë në Futsall bën pjesë në një grup me Ukrainën, Kroacinë dhe Danimarkën, në një grup ku sipas rregullohes ndeshjet janë miratuar të luhen me sistem vajtje-ardhje.