Vllaznia është gati për ndeshjen e radhës, atë ndaj Teutës së Durrësit që do të luhet mbrëmjen e së shtunës në stadiumin “Loro Boriçi” duke filluar nga ora 20:15.
Përballja e së martës me Laçin në transfertë, përpos humbjen me rezultatin 2 me 1, dha efekte negative edhe në lëndimin e tre futbollistëve titullarë, Hakajt, Malës dhe Pusit.
Mungesa këto që natyrshëm u shndërruan në problem për stafin teknik duke i detyruar të zgjedhin alternativat e mundshme për zëvendësimin e tyre.
Megjithatë, puna e mirë e stafit mjekësor kuqeblu ka bërë që në kohë rekord dy prej të dëmtuave, dhe konkretisht Mala dhe Pusi të kenë përmirësime të ndjeshme.
Një gjë e tillë është vërejtur edhe në seancën e pasdites së sotme zhvilluar në fushën sportive të Golemit ku dyshja Mala-Pusi është parë t’i bashkohet skuadrës në stërvitje
Ndërkohë, për mëngjërashin e prapavijës Ersin Hakaj, duket se pesha e dëmtimit është më e rëndë, ku sipas stafit mjekësor ai do t’i mungojë skuadrës në sfidën e së shtunës me Teutën.
Gjithçka pritet të vendoset të premten, që është edhe seanca e fundit stërvitore anti-Teuta. Gjithësesi, përgjithësisht duhet thënë se në kampin kuqeblu mendojnë se janë gati për sfidën me durrsakët, madje ka entuziazëm dhe besim të plotë se do ta kalojnë me sukses.
