17 gola janë shënuar në javën e dytë të Kategorisë së Parë. Rezultati më befasues është regjistruar në stadiumin “Brian Filipi” të Lezhës, ku Besëlidhja është mundur nga Korabi me rezultatin 1 me 2, duke e rënduar akoma më shumë situatën në kampin lezhjan pas humbjes së pësuar edhe në javës e parë me Kukësin 2-0. Ndërkohë, me fitore i kanë mbyllur ndeshjet e tyre edhe Iliria, Bylisi, Pogradeci dhe Besa, kjo e fundit me rezultat të thellë 0 me 4 në transfertë me Sopotin.
Besëlidhja-Korabi 1-2
Në Lezhë Korabi mori një fitore të vlefshme 2-1 ndaj Besëlidhjes. Miqtë kaluan në avantazh në minutën e 24-të me Markun, ndërsa në të 60-ën Reçi dyfishoi shifrat. Besëlidhja u përpoq të rikthehej në lojë dhe në minutën e 87-të Akansase shënoi për 1-2, por reagimi erdhi shumë vonë dhe Korabi ruajti avantazhin deri në fund.
Iliria-Kukësi 3-1
Një tjetër fitore bindëse u regjistrua nga Iliria e cila mposhti Kukësin 3-1. Vendasit e nisën shumë mirë ndeshjen dhe kaluan në avantazh që në minutën e 8-të, kur Kithambo realizoi nga pika e bardhë e penalltisë. Në minutën e 28-të Jakubu shënoi golin e dytë, duke i dhënë Ilirisë një avantazh të rëndësishëm që në pjesën e parë. Kukësi reagoi në minutën e 64-të me Alison, gjithashtu nga penalltia, por në minutën e 84-të Hasani mbylli llogaritë duke realizuar golin e tretë të vendasve.
Oriku-Bylis 1-2
Bylis siguroi një fitore dramatike 2-1 ndaj Orikut. Takimi mbeti i hapur deri në minutat e fundit, me P.Markun që zhbllokoi rezultatin në minutën e 73-të. Oriku reagoi dhe në të 88-ën Mezani riktheu baraspeshën, por festa e vendasve zgjati shumë pak. Në minutën e tretë shtesë Emini shënoi golin e fitores për ballshiotët duke u dhënë atyre tri pikë të arta në transfertë.
Pogradeci-Kastrioti 2-1
Pogradeci gjithashtu shfrytëzoi faktorin fushë, duke mundur Kastriotin 2-1. Kambato kaloi liqenasit në avantazh në minutën e 15-të, ndërsa Kastrioti arriti të barazonte në minutën e tretë shtesë tëbpjesës së parë me Xhixhon. Gjithsesi vendasit u rikthyen në epërsi në minutën e 59-të me Shanajn, gol që rezultoi vendimtar për fatin e takimit.
Sopoti-Besa 0-4
Rezultati më i thellë i ditës erdhi në sfidën Sopoti-Besa ku kavajasit triumfuan 4-0 në transfertë. Besa e nisi në mënyrën më të mirë të mundshme, duke shënuar që në minutën e parë me Danajn. Në minutën e 42-të Prengaj dyfishoi avantazhin ndërsa në pjesën e dytë skuadra mike vazhdoi dominimin. Ruzgis shënoi golin e tretë në minutën e 76-të dhe në minutën e 84-të Spahiu nga pika e bardhë e penalltisë vulosi rezultatin përfundimtar 0-4.
Një javë me shumë gola dhe përmbysje emocionesh ku disa skuadra morën sinjale pozitive për vazhdimësinë ndërsa të tjerat do të duhet të reagojnë shpejt në javët e ardhshme.
Gara në Kategorinë e Parë ka nisur me ritëm të lartë dhe diferencat mes skuadrave pritet të bëhen edhe më të dukshme në vazhdim. Pas ndeshjeve të javës së dytë, tabelen e klasifikimit e kryeson Korabi me 6 pikë, Besa, Iliria, Bylis, Pogradeci kanë nga 4 pikë, Kukesi 3, Flamurtati 2, Kastioti dhe Sopoti me 1, Oriku dhe Beselidhja ne fund me 0 pikë.
Fatos LAMAJ
