E para ishte ANSA më pas të gjithë mediet italiane kanë publikuar lajmin e bujshëm sipas të cilit Pol Pogba nuk ka kaluar testin e anti-doping pas ndeshjes mes Udinezes dhe Juventusit. Burime pranë grupit që ka kryer kontrollin në atë ndeshje thuhet se sasia e testosteronit në trupin e lojtarit ka qenë mbi normën e lejuar.
Testosteroni është një substancë që nuk mund të merret me një përjashtim terapeutik. Prandaj, Pogba rrezikon një dënim maksimal prej katër vitesh skualifikim. Ndërkohë do të duhet të bëhen kundër analiza për të konfirmuar pozitivitetin dhe për të kuptuar se cila mund të jetë linja mbrojtëse e francezit, kampion bote në vitin 2018.
Rasti i fundit i një polemike dopingu në Serinë A është ai i argjentinasit tek Atalanta, Hose Luis Palomino, i cili doli pozitiv për nandrolone në vitin 2022, por më pas u lirua nga Gjykata Kombëtare anti-doping.
