Java e 17-të e Kampionatit Kombëtar të futbollit për kategorinë e parë ka në kalendar një përballje interesante. Bëhet fjalë për atë Tërbuni-Besëlidhja, ose më ndryshe, derbi verior. Dy skuadra, me dy tifozëri të zjarrta, që sa herë janë ndeshur njëra me tjetrën kanë dhuruar emocione.
Edhe këtë radhë, pritet të jetë e njëjta histori, në një ndeshje që pukjanët kërkojnë të ngjiten në grupin e skuadrave kryesuese dhe lëzhjanët që luftojnë për mbijetesë.
Por, ndër të tjera, ajo që e bën edhe më interesante këtë ballafaqim, që do të luhet këtë të shtunë në stadiumin “Ismail Xhemali” të Pukës duke nisur nga ora 13:00, ka të bëjë me lëvizjet më të fundit në stafet teknike të të dyja skuadrave.
Dorëheqja nga drejtimi i Tërbunit e trajnerit Alert Alcani pas rezultatit negativ në transfertë me Tomorrin ka bërë që KF Tërbuni dhe Bashkia Pukë të emërojë në postin e trajnerit, Ramadan Ndreun. Ndërkohë, ish trajneri i Tërbunit, Alert Alcani, me t’u larguar nga Puka, presidenti i Besëlidhjes, Xhulio Noka e ka emëruar menjëherë në detyrën e drejtorit sportiv të klubit lezhjan.
Që do të thotë se këtë fundjavë, krahas të tjerave, në këtë ndeshje pritet të ketë edhe një sfidë drejtuesish, në mes trajnerit të ri të Tërbunit, Ramadan Ndreu dhe drejtorit të ri sportiv të Besëlidhjes, Alert Alcani.
Një ndeshje kjo për tu parë, e cila pritet të jetë shumë e dyluftuar për vetë nevojat e domosdoshme që kanë të dy ekipet për të marrë pikët maksimale. Vendasit aktualisht në vendin e nëntë të renditjes me 20 pikë, duke kërkuar ringritjen aty ku ishin deri pak jëvë më parë, në grupin e katër skuadrave më të mira të kampionatit me pretendimet e kualifikimit në Superiore, dhe Besëlidhja e vendit të parafundit me 14-të pikë, në kërkim të mbijetesës në kategorinë e parë.
