Në 80 vjetorin e tij të lindjes dhe 65 vjetorin e kontributit si sportist dhe si mjek i ekipeve sportive Vllaznia, kryetari i bashkisë Shkodër Bardh Spahia, vlerësoi me titullin “Mirënjohje”, një prej emrave të shquar të sportit dhe mjekësisë shkodrane, Zyhdi Çobën.
Ceremonia në fjalë u zhvillua mesditën e sotme në zyrën e kryetarit të Bashkisë Shkodër, Bardh Spahia me praninë e pjesëtarëve të familjes Çoba, si dhe miqve të afërt të doktor Zyhdisë, veteran të sportit shkodran, gazetarë sportivë, etj.
Ceremonisë në fjalë i janë bashkangjitur edhe pjesëtarë të Federatës Shqiptare të Futbollit, ku në emër të Presidentit të FSHF-së, Armand Duka, ka qënë antari i Komitetit Ekzekutiv, ish futbollisti shkodran, Bardhyl Jera, Drejtori i Sektorit të Edukimi në FSHF, Sulejman Starova dhe përgjegjësi për marrëdhëniet me publikun, Tritan Kokona, të cilët i dorëzuan doktor Çobës, çmimin “Pllakatë-FSHF”, uniformën e kombëtares kuqezi me mbishkrimin Çoba dhe numrin 80-të të viteve të tij, si një foto kujtim në vite.
Krahas kreut të Bashkisë Shkodër, Bardh Spahia që foli me shumë respekt për figurën e doktor Zyhdisë, për vlerat e doktor Çobës, folën me shumë respekt, edhe ish futbollistët shkodranë, Fatbardh Jera, Rauf Çanga, Ismet Hoxha, presidenti i KFF Vllaznia, Lazër Matija. Ndërkohë, që vetë mjeku sportiv Zyhdi Çoba dhe bashkeshortja e tij Kydret Çoba, falenderuan kryebashkiakun Spahia dhe FSHF-në, por edhe miqtë e afërt që e nderuan në këtë ditë të shënuar për familjen Çoba.
Aktiviteti në nderim të përvjetorit të 80-të të lindjes së mjekut të njohur sportiv shkodran, i konsideruar si një nga legjendat e gjalla të sportit shkodran në vite, Zyhdi Çoba, vijoi me një drekë festive shtruar në Bar Restaurant Elita nga familja Çoba.
(Video) Ceremoni-Kryetari i Bashkisë Shkodër, Bardh Spahia, pret mjekun sportiv, Zyhdi Çoba. Dekorime në 80 vjetorin ne lindjes nga Bashkia dhe FSHF)
Gaspër MARKU
