Vllaznia ka marrë fitoren e parë të sezonit duke mposhtur Dinamon me rezultatin 1-0 në përballjen e javës së gjashtë të “Abisnet Superiore”.
Debutimi i trajnerit Csaba Laszlo në pankinën shkodrane është shoqëruar me tri pikë të rëndësishme në një sfidë të luftuar dhe të vendosur nga një gol i Edon Murataj.
Momenti përcaktues erdhi në minutën e 31-të me Murataj që goditi nga distanca dhe topi pasi u përplas në shtyllë përfundoi në rrjetë. Një finalizim i bukur që kaloi kuqeblutë në avantazh dhe rezultoi vendimtar për fatin e takimit.
Dinamo nuk arriti të gjente golin e barazimit ndërsa Vllaznia e ruajti epërsinë deri në vërshëllimën përfundimtare.
Shkodranët mbyllën kështu pritjen për suksesin e parë në kampionat duke e nisur me fitore bashkëpunimin me teknikun e ri.
Ky rezultat i jep frymëmarrje Vllaznisë që ngjitet në vendin e shtatë me pesë pikë.
Përtej përmirësimit në renditje fitorja përballë një kundërshtari si Dinamo është një shtysë për besimin e skuadrës në vazhdimësi,ndërsa Dinamo nga ana tjetër mbetet në kuotën e 12 pikëve në vendin e tretë.
Në javën e ardhshme Vllazninë e pret transferta në Rrogozhinë përballë Egnatias, ndërsa Dinamo do të pres në shtëpi Teutën kryesuese.
(Video) Momentet pikate të ndeshjes Vllaznia-Dinamo(1-0), mund t’i ndiqni në kanalin tonë Zyrtar, Veriu Sport-YOUTUBE
Fatos LAMAJ
