Ndeshja e sotme, Vllaznia-Egnatia që luhet në stadiumin “Loro Boriçi” duke nisur nga ora 16:30, pritet të jetë shumë luftara. Me një Vllazni që kërkon patjetër tre pikëshin për të ecur në rrugën e pretendimeve për titull, gjë që është deklaruar nga stafi teknik dhe vetë futbollistët kuqeblu. Si dhe nga ana tjetër kemi një Egnatia simpatike të këtij sezoni futbollistik, e cila me ardhjen në krye të trajnerit Shpëtim Duro, duke pasur në krah edhe shkodranin Ndriçim Shtubina në cilësinë e drejtorit sportive, por dhe ish kuqeblu në formacion si portjeri Sherri si dhe mbrojtësit Malota dhe Fangaj. Në pritje të kësaj ndeshje, tekniku i rrogozhinasve shprehet optimist për rezultat pozitiv, madje deklaron hapur se nuk dalin pa pikë nga Shkodra.
Si e gjen Egnatian rifillimi i kampionatit. Çfarë atmosfere sundon në skuadër?
Ne do të donim që kampionati të mos ndërpritej. Kjo gjë megjithatë nuk na takon ne. Gjendja është e mirë. Kemi vijuar stërvitjen njëmujore dhe deri në këto momente jemi në rregull.
A ka ndonjë problem me formacionin, mungesat e sigurta si thuhet ndryshe?
Skuadra është e plotë ndonëse kemi dy shqetësime të vogla prandaj do të vendosim nesër(sot) për formacionin. Sigurisht do të shohim deri para ndeshjes. Por ne megjithatë kemi 22 futbollistë dhe do të kemi një formacion të koncentruar mirë.
Me një pozitë të stabilizuar në renditje, kjo transfertë pritet të luhet nga Egnatia me besim e siguri. Çfarë “armësh” të forta ka për këtë qëllim?
Kemi pasur ecuri të mirë në ndeshjet e fundit. E rëndësishme për mua është vazhdimësia. Pa eufori, duke i marrë ndeshjet një e nga një dhe duke i vlerësuar me seriozitet maksimal. Në fazën e parë Egnatia e ka mundur Vllazninë me shifrat e pastra 3-0. I trembeni reagimit të shkodranëve? Dihet që Egnatia ka fituar 3-0. Nuk kam qenë unë në krye të saj. Ajo ndeshje ka histori tjetër. Kjo ndeshje tani ka tjetër histori besoj. Deri këtu ku kemi ardhur është mundi dhe djersa e të gjithëve. Prandaj nuk ka asnjë arsye të trembemi.
Vllaznia në mesjavë humbi finalen e Superkupës në limitet e kohës shtesë. E ndoqët besoj atë takim dhe cilat gjëra mund t’i shërbejnë skuadrës suaj që të jetë e vëmendshme për të dalë me rezultat pozitiv nga Shkodra?
Ajo finale u ndoq me interes sikurse nga të gjithë, edhe nga ne. Nuk ka avantazh kjo gjë për ne. Do të luajmë thjeshtë e shtruar me kolektivitet dhe me dëshirën për të mos dalë pa pikë nga kjo ndeshje.
