Dëbora që ka përfshirë një pjesë të mirë të vendit tonë ka dhënë ndikimet e veta edhe në terrenet sportive. Informacionet që vijnë nga Peshkopia, aty në orën 13.30 është në program të luhet ndeshja e javës së 11-të të kategorisë së parë, Korabi-Veleçiku, dëbora ka zbardhur qilimin e stadiumit të Peshkopisë. Fotot e shkrepura nga gazetari dhe komentatori i njohur dibran, Fatmir Zhuzhi, i cili është në pritje të komentit të kësaj ndeshje për emisionin “Nga njëra ndeshje në tjetrën” të Radio Tiranës, tregojnë qartë situatën atje.
Nga sa bëhet e ditur, punonjësit e terreneve sportive të klubit dibran janë shumë të angazhuar dhe po punojnë intensivisht për pastrimin e terrenit deri në atë nivel sa sipas rregullores ndeshja mund të zhvillohet. Edhe pse kushtet janë të vështira, gjithësesi pritet për t’u parë në vijimësi, pasi punonjësit e stadiumit kanë edhe rreth dy orë kohë në dispozicion për të normalizuar situatën dhe ndeshja të zhvillohet.
