Pas finales së Kupës, është rikthyer Kampionati Kombëtar i Futsallës, teksa janë luajtur të dielën dhe të hënën ndeshjet e javës së shtatë.
Në takimin e së dielës, Tirana pësoi humbjen e parë për këtë sezon ndaj Flamurtarit. Ndeshja e luajtur në pallatin e sportit “Asllan Rusi” përfundoi me rezultatin 3-1 në favor të vlonjatëve. Pavarësisht humbjes, bardheblutë vijojnë të kryesojnë kampionatin, teksa janë në vendin e parë me 18 pikë.
Sakaq, në sfidën e luajtur në kompleksin “Goga Basket” në Durrës, Vllaznia mposhti skuadrën e Partizanit me shifrat 7-6. Shkodranët falë kësaj fitoreje ngjiten në vendin e dytë, me 8 pikë, ndërsa Flamurtari dhe Partizani ndodhen në kuotë të barabartë pikësh, me 7.
Në javën e tetë të Kampionatit Kombëtar të Futsales, spikat përballja, Tirana-Vllaznia, një klasike e futbollit shqiptar, e cila vjen menjëherë, një ditë pas klasikes, Vllaznia-Tirana për Abissnet Superiore, sfidë kjo që luhet të shtunën në stadiumin “Loro Boriçi”.
Rezultatet e javës së shtatë të Kampionatit të Futsallës:
Tirana Futsal – Flamurtari Futsal 1-3
Partizani Futsal – Vllaznia Futsal 6-7
Renditja:
1 Tirana Futsal 18 pikë
2 Vllaznia Futsal 8 pikë
3 Flamurtari Futsal 7 pikë
4 Partizani Futsal 7 pikë
(Video) Pamje nga ndeshja, Partizani-Vllaznia 6-7. K. Kombëtar Futsal, java e shtatë
