Pas vendimit për shtyerjen me 24 orë të finales së Kupës së Shqipërisë mes Skënderbeut dhe Vllaznisë e përcaktuar tashmë të luhet me datë 31 maj në stadiumin kombëtar “Air Albania” duke filluar nga ora 19:00, Federata Shqiptare e Futbollit ka bërë edhe një hap tjetër përpara. Bëhet fjalë për praninë e tifozëve në stadium, një kërkesë kjo e përsëritur edhe herë tjetër në adresë të Ministrisë së Shëdetësisë dhe Mbrojtjes Sociale, por që kësaj here me nota shumë më tepër serioze dhe këmbëngulëse.
Burime zyrtare nga Institucioni më i lartë i futbollit në Shqipëri, FSHF bëjnë të ditur për Veriu Sport, se nga ana e tyre i është dërguar një shkresë zyrtare Ministrisë së Shëndetësisë dhe Mbrojtjes Sociale ku i kërkohet të lejohen tifozët për ta ndjekur ndeshjen nga afër në shkallët e stadiumit “Air Albania”. Kërkesë kjo që vjen nisur nga rënia e dukshme e rasteve të infeksionit, por edhe nga prvoja e vendeve të Rajoni ku ndeshjet e finaleve të Kupës po zhvillohen me praninë e tifozëve. Natyrisht që nuk bëhet fjalë për të hapur të gjithë kapacitetin e stadiumit, por vetëm një përqindje të caktuar tifozësh dhe gjithnjë duke marrë masat e duhura higjenike sipas rregullohes përkatase nga vetë federata.
