Edicioni i dhjetë i kursit të licencimit për trajnerë të nivelit “UEFA PRO”, niveli më i lartë i kualifikimit për trajnerët e futbollit, ka nisur nën drejtimin e ekspertëve të Departamentit të Edukimit në FSHF.
Kursi do të zgjasë 24 muaj, deri në nëntor 2027, dhe synon të ofrojë njohuri gjithëpërfshirëse në të gjitha fushat që mbulon roli i një trajneri profesionist.
Në këtë kurs, numri i pjesëmarrësve është i limituar, 21 në total. Mes tyre spikasin emra të njohur të futbollit shqiptar e ndërkombëtar, si vëllezërit Migjen dhe Vullnet Basha, ish-futbollistë të Kombëtares shqiptare.
Po ashtu, pjesë e kursit janë edhe trajneret e ekipeve kombëtare të vajzave U-15 dhe U-17, përkatësisht Rabie Tota dhe Cyme Lulaj. Po ashtu pjesë e kursit janë edhe trajnerët Ditmar Bicaj, Atdhe Nuhiu, Alfred Deliallisi etj.
Leksionet do të zhvillohen nga drejtuesit dhe ekspertët e Departamentit të Edukimit të FSHF-së, ndërsa herë pas here do të ftohen lektorë ndërkombëtarë për të ndarë përvoja dhe për të mbajtur seanca praktike e teorike me pjesëmarrësit.
