Dinamo ka siguruar kualifikimin në çerekfinalet e Kupës së Shqipërisë, pasi ka mposhtur Besën me rezultatin e pastër 3-0 në ndeshjen e zhvilluar në stadiumin “Air Albania”. Skuadra e drejtuar nga trajneri Ilir Daja tregoi qetësi dhe efikasitet, duke e zgjidhur takimin pa vështirësi.
Blutë e nisën ndeshjen në mënyrën më të mirë të mundshme, duke kaluar në avantazh që në minutën e 12-të. Bernard Berisha përfitoi nga një gabim i prapavijës së Besës dhe e dërgoi topin në rrjetë, duke i dhënë epërsinë Dinamos.
Pas një loje të kontrolluar gjatë gjithë takimit, goli i dytë erdhi në minutën e 80-të, kur Bregu dyfishoi shifrat dhe praktikisht mbylli llogaritë e kualifikimit. Në minutat shtesë, Hekuran Berisha vulosi rezultatin përfundimtar 3-0, duke konfirmuar dominimin e Dinamos.
Me këtë fitore, Dinamo avancon në çerekfinalet e Kupës së Shqipërisë dhe pret shortin për fazën tjetër të kompeticionit, ku do të jetë pjesë e vazos së parë. Skuadra e Ilir Dajës konfirmon kështu ambiciet për të qenë një nga pretendentët kryesorë për trofeun.
