Ashtu siç ishte planifikuar, ora 21.00 e mbrëmjes së premte të 11 qershorit ka sjellë ndeshjen hapëse të Kampionatit Europian të futbollit, atë mes Italisë dhe Turqisë, çift ky që bën pjesë në grupin A. Një sfidë e cila në pragndeshje komentohej si e vështirë për italianët duke pasë parasysh vlerat e rritje të futbollit turk të viteve të fundit. Por, realisht ndeshja e luajtur në “Olimpiko” të Romës ka folur tërësisht për skuadrën italiane, e cila doli fituese me rezultatin e pastër 3 me 0. Azurrët kanë dominuar tërësisht takimit, ku megjithë rastet e shumta të pjesës së parë, fraksioni i parë i ndeshjes mbyllet në barazim 0-0.
Një 45 minutësh ky ku nuk kanë munguar dhe pretendimet për 11-metërsh, të paktën në dy momente për italianët dhe në një për turqit, por për gjyqtarët gjithçka ishte e rregullt.
Shpërthimi i italianëve duket se ishte ruajtur në pjesën e dytë të ndeshjes ku
skuadra e drejtuar nga Mançini ka treguar gjithë potencialin e saj, duke mos lënë asnjë mundësi për kundërshtarin. Italianët arrijnë të gjejnë golin e avantazhit në minutën e 58-të. Demiral ka shkaktuar autogol, duke devijuar në portë një top të krosuar nga Berardi. Një gol që e zhyt më shumë në vështirësi skuadrën e Gunes, ndërsa Italia arrin të gjejë dhe golin e dytë në minutën e 65-të me anë të Imobile.
Nuk vonon shumë dhe Lorenco Insinje ka vendosur emrin e tij në listën e golashënuesve për këtë sfidë. Është pikërisht minuta e 79-të e takimit dhe sulmuesi i Napolit ka konkretizuar një kombinim mes Barela dhe Imobile. Dominim i frikshëm i italianëve, 3-0, që mbetet në fuqi deri në sinjalizimin e fundit të gjyqtarit.
Statistika:
- Italia shënoi tre gola në një ndeshje të Kampionatit Europian për herë të parë.
- Kjo është hera e parë në historinë europiane që goli i parë i turneut ishte një autogol.
- Për herë të parë në Kampionatin Europian, Italia shënoi me një autogol.
- Ciro Immobile tani ka arritur 14 gola me kipin kombëtar, golashënuesi më i mirë së bashku me Balotelli në mesin e lojtarëve aktivë.
- Në fushë kundër Turqisë, Giorgio Chiellini merr pjesë në Kampionatin e tij të katërt Europian, duke barazuar rekordin e Gianluigi Buffon dhe Alessandro Del Piero.
- Giorgio Chiellini (36 vjeç e 301 ditë) tani është bërë lojtari më i vjetër në fushë që luan një ndeshje europiane me fanellën e Italisë.
- Gianluigi Donnarumma (22 vjeç e 106 ditë) është bërë sot portieri më i ri në Itali që luan në një ndeshje midis Kampionatit Europian dhe Kupës së Botës.
- 14 goditje për Italinë në pjesën e parë: maksimumi për një skuadër pa gol në pjesën e parë në Kampionatin Europian që nga nga Rusia kundër Greqisë në 2012 (16).
- Italia goditi 14 herë më shumë se Turqia në pjesën e parë (14-0), diferenca më e madhe në gjuajtjet e pjesës së parë në një ndeshje të Kampionatit Europian që nga viti 2004, kur Hollanda kishte provuar 16 dhe Letonia një.
