Egnatia triumfoi 4-2 ndaj Teutës, në ndeshjen e javës së 27-të në Kategorinë Superiore.
Një përballje spektakolare në Rrogozhinë,ku festa në fund ishte për vendasit.
Miqtë e nisën mirë ndeshjen dhe gjetën avantazhin në minutën e 25-të me Zhongon.
Megjithatë, Egnatia përmbysi gjithçka brenda pjesës së parë.
Albanese barazoi në minutën e 40-të pas një gafe te portierit Selmani,ndërsa Adjesa shënoi të dytin në minutën e tretë shtesë.
Në fraksionin e dytë Teuta riktheu baraspeshën me Maçollin nga pika e bardhë e penalltisë në minutën e 54-të.
Durrsakët mbetën me dhjetë lojtarë në minutën e 79-të pas kartonit të kuq për Kotobellin.
Vetëm një minutë më vonë Buric riktheu avantazhin për vendasit,teksa ndeshjen e vulosi Fernando i cili shënoi të katërtin në minutën e 93-të.
Me këtë sukses Egnatia mban vendin e tretë me 49 pikë po aq sa Elbasani i vendit të dytë dhe dy pikë më pak se Vllaznia kryesuese,me të cilën përballet javën e ardhshme,ndërsa Teuta renditet në vendin e gjashtë me 34 pikë të grumbulluara.
Fatos LAMAJ
