Kategoria e Parë, luajti ndeshjet e javës së 29-të të kampionatit, të cilat kanë dhuruar rezultate interesante.
Skënderbeu vuan, por arrin që të kalojë në frymën e fundit Ilirinë, falë një goli të shënuar nga Beshiraj në kohën shtesë. Korçarët fitojnë 1-0 dhe ruajnë kreun e klasifikimit, tashmë në kuotën e 70 pikëve.
Laçi rikthehet te fitorja dhe mposht 3-1 Burrelin në shtëpi. Kurbinasit ngjiten në kuotën e 67 pikëve në vendin e dytë në klasifikim.
Pogradeci vazhdon serinë e fitoreve dhe mposht me rezultatin e thellë 5-1 Kastriotin në këtë javë të kampionatit. Liqenorët vazhdojnë të shpresojnë te ngjitja direkte në elitë, pasi diferenca me kreun është 6 pikë, ndërsa me vendin e dytë vetëm 3 pikë.
Kukësi fiton një tjetër derbi mbijetese, mposht 2-0 Apoloninë dhe hedh një hap të madh drejt qëndrimin në Kategorinë e Parë. Verilindorët shkojnë 27 pikë dhe parakalojnë fierakët në renditje.
Një fitore të rëndësishme në luftën për mbijetesë ka arritur edhe Lushnja, që ka mposhtur në shtëpi 2-1 Korabin.
Luftëtari-Besa, e cila luhet sot, mbyll javën e 29-të të kampionatit, sfidë kjo e cila transmetohet në rrjetin e Radio Televizionit Shqiptar, prej orës 15:00.
