Fitore e merituar e Suedisë ndaj Polonisë me rezultatin 3 me 2, por minutat e fundit të sfidës së luajtur mbrëmjen e sotme në Shën Peterburg për llogari të grupit E patën jo pak emocione, pasi polakët e kërkuan me ngulm golin e barazimit. Skuadra e teknikut Janne Andersson reflektoi karakter dhe pjekuri por edhe guxim pasi hyri në ndeshje me besimin se vetëm fitorja mund ta mbante larg telasheve dhe e arriti një gjë të tillë edhe mes drithërimave në 10 minutat e fundit.
Sukses 3-2, pothuajse historik për Suedinë që e kualifikon për më tej si të parën e grupit E. Nuk ishte ndeshja e llogarive dhe kjo u reflektua që në shkelminimin e parë të topit ku Emil Forsberg e nisi në mënyrën më të mirë të mundshme këtë ndeshje shumë delikate për Suedinë pas vetëm 81 sekondave lojë.
Gol i rëndë që mund të kishte rrëzuar edhe një elefant dhe kjo u reflektua në reagimin e dobët të Polonisë që mori një shuplakë të fortë. Kronometri nuk punonte në favor të skuadrës së Paulo Sousas që nuk u demoralizua dhe fitoi terren duke flirtuar me golin në dy raste ku Leëandoëski luftoi me shtyllën dhe fatin. Skuadër më e vendosur dhe e rrjedhshme në aksione Polonia por Suedia cinike në tentativën e dytë të rrezikshme të ndeshjes, gjeti një tjetër gol.
Kulusevski gjeti sërish Forberg i cili nuk fali sërish duke e futur ndeshjen në shinat që të çojnë për Stokholm. Pak sekonda festë dhe më pas rikthim me këmbë në tokë. Kur në fushë kundërshtar ke Leëandoëskin ndoshta nuk është asnjëherë e rekomanduar të relaksohesh dhe për këtë janë dëshmitare suedezët të cilët pësuan dy gola të shpejtë nga shtatlarti i Bayernit të Mynihut.
Kur Polonia po shtynte me të gjitha forcat për të gjetur golin e tretë, Claeson i ndëshkoi me një gol që vrau çdo shpresë. Polonia largohet me vetëm një pikë nga Euro 2020 ndërsa Suedia shikon drejt datës 29 Qershor.
