Çmimi i Madh i Australisë në Formula 1 fitohet nga Sharl Lëklerk. Në garën e zhvilluar të dielen, Lëklerk ka korrur një fitore bindëse teksa rivali i tij, Maks Verstapen, u tërhoq nga gara. Piloti i “Ferrari”-t që u nis nga vendi i parë në këtë garë që u rikthye pas 3 vitesh në pistën e Melbërnit, e udhëhoqi atë gjatë gjithë kohës, edhe përtej futjes dy herë të makinës së sigurisë. Por në të dy rastet, Lëklerk e la prapa Verstapenin, edhe pse holandezi e vuri nën presion pilotin nga Montekarlo pas rinisjes së dytë. Serxhio Perezi e mbylli garën në vendin e dytë, duke mbajtur lart flamurin e skuadrës së “Red Bull”-it, teksa la prapa Xhorxh Rasëllin, i cili përfitoi më së shumti nga futja e dytë e makinës së sigurisë, por vetëm pasi i bëri ballë në finish. një sulmi të shokut të skuadrës së “Mercedes”-it, Ljuis Hemiltonit.
Ndonëse në nisje Verstapen bëri një përpjekje, por pa rezultat, për t’ia rrëmbyer Lëklerkut vendin e parë, me Hemiltonin që i mori vendin e 3-të Perezit, por gjithçka u fshi në xhiron e dytë, pas daljes nga gara të pilotit tjetër të “Ferrari”-t, Karlos Sainz, ndërsa makina e sigurisë mbeti në pistë deri në xhiron e 7-të. Lëklerk e ruajti pa problem vendin e parë pas largimit të saj, ndërsa Verstapen vuajti me gomat dhe u fut për t’i ndërruar ato në fund të xhiros së 18-të. Piloti i “Ferrari”-t i ndërroi ato në xhiron e 22-të dhe futja menjëherë më pas në pistë e makinës së sigurisë, pas aksidentit të Sebastian Fetelit, bëri që pas rinisjes në xhiron e 27-të, Verstapen të sulmonte edhe më fort, por Lëklerk tregoi pjekuri dhe karakter, duke e ruajtur kryesimin dhe pas xhiros së 35-të, ai ishte 5 sekonda i shkëputur nga holandezi.
Por 4 xhiro më pas, Maks Verstapen u tërhoq nga gara, për shkak të një problemi në motor. Pas kësaj gara nuk kishte më histori, teksa Lëklerk, i cili e kishte rikthyer “Ferrari”-n në nisjen nga vendi i parë për herë të parë në pistën e Melburnit, i dhuroi asaj fitoren pas 4 vitesh në garën australiane, dhe të 239-ën për skuadrën italiane në Formula 1.
Ndërkohë, pas farës së 3-të të sezonit, Sharl Lëklerk i “Ferrari”-t kryeson renditjen e përgjithshme të pilotëve, me 71 pikë, i ndjekur nga Xhorxh Rasëll i “Mercedes”-it me 37, Karlos Sainz i “Ferrari”-t, me 33, Serxhio Perez i “Red Bull”-it me 30, Ljuis Hemilton i “Mercedes”-it, me 28 dhe Maks Verstapen i “Red Bull”-it, me 25.
Kurse në renditjen e skuadrave, kryeson “Ferrari”, me 104 pikë, i ndjekur nga “Mercedes”-i, me 65, “Red Bull”-i me 55, “MekLaren” me 24 dhe “Alpine” me 22. Emocionet e garës australiane të Formulës 1 erdhën të dielën në mëngjes me orën e Tiranës drejtpërdrejt në Rrjetin e Radio-Televizonit Shqiptar.
RENDITJA
- Leclerc 71
- Russell 37
- Sainz 33
- Perez 30
- Hamilton 28
- Verstappen 25
- Ocon 20
- Norris 16
- Magnussen 12
- Bottas 12
- Ricciardo 8
- Gasly 6
- Tsunoda 4
- Alonso 2
- Zhou 1
- Albon 1
- Schumacher 0
- Stroll 0
- Hulkenberg 0
- Latifi 0
