Volejbolli shqiptar, ashtu si edhe skuadrat e tjera të lojrave me dorë vazhdon të jetë i penalizuar nga Ministria e Shëndetësisë për shkak të Covid-19 duke mos u lejuar në luajtjen e kampionatit kombëtar në Shqipëri. Situata në fjalë ka krijuar pakënaqësi të mëdha tek komuniteti i volejbollit, ndërkohë që po mendon seriozisht t’i bashkangjitet kampionatit të Kosovës. Shqetësimit në fjalë i është bashkangjitur edhe Federata Shqiptare e Volejbollit, e cila nuk do të gjejë zgjidhje pranë strukturave të qeverisë shqiptare do të mbështesë plotësisht propozimi në fjalë. Burime zyrtare pranë kësaj federate bëjnë me dije se nga ana e tyre i kanë bërë të gjithë hapat e nevojshëm për këtë kauzë, ndërsa pas përgjigjes negative që morëm së fundmi, i kanë kërkuar takim urgjent Ministrisë së Shëndetësisë. “Duam që të na argumentojnë pse volejbolli është sport i rrezikshëm dhe transporti publik, kafenetë apo sportet e kontaktit si futbolli nuk janë. Ne mendojmë se ata nuk janë thelluar në vendim e marrë dhe mbi të gjitha na duket një përgjigje shabllon, duke i grupuar të gjitha sportet bashkë”, janë shprehur për mediat presidenti Pëllumbi dhe sekretari Vokopola. Duke marrë si shembull Kosoven ku atje kampionati i lojrave me dorë po luhet normalisht, ato kanë paralajmëruar se mund ta transferojnë kampionatin shqiptar atje. “Ne do t’i shikojmë të gjitha mundësitë që volejbolli të luhet dhe nuk do të lejojmë që ky sport të vdesë. Në qoftë se nuk arrijmë të kuptojmë logjikën që volejbolli nuk është sport i rrezikshëm, ne do të shfrytëzojmë të gjitha hapësirat për të zbritur në parket. Kështu që do të diskutojmë edhe këtë opsion me klubet për t’u bërë pjesë e kampionatit kosovar, në mënyrë që volejbolli të vazhdojë të luhet”, kanë sqaruar më tej ato.