SHQIPËRI – KOSOVË 2-1
(Shënues: Balaj 31′, Uzuni 64′ / Muriqi 85′)
E mërkurë, 11 nëntor 2020, ora 16.00, stadiumi “Elbasan Arena”
Përballja miqësore në mes kombëtares së Shqipërisë dhe asaj të Kosovës e luajtur pasditen e sotme në “Elbasan Arena” ka përfunduar me fitoren e kuqezinjëve tanë me rezultatin 2 me 1. Goli i parë i kësaj ndeshjeje ka ardhur në minutën e 31-të me autor shkodranin Bekim Balaj, i cili ka shftytëzuar një kros brenda zonës dhënë nga e majta e sulmit kuqezi me protagonist Uzunin. Bjondi shtatlartë, që në një farë mënyre i kishte munguar kombëtares sonë për disa ndeshje, nuk nguroi të tregonte aftësitë e tij individuale duke e dërguar topin menjëherë në rrjetë. Jo vetem goli, por edhe veprimet plot ritem gjatë ecurisë së takimit treguan se Balaj është një futbollist i vlefshëm për formacionin e Rejes, gjë e cila me siguri do të konkretizohet edhe nga vendimet e teknikut kuqezinjë për t’i dhënë minutat e duhura në ndeshjet e ardhshme.
Goli i dytë ka për autor Uzunin në minutën e 64-tërt, që për mënyrën se si e realizoi me atë adresim të topit në trekëndëshin e sipërm të portjerit kosovar Muriç meriton vlerësime maksimale. Ndërkohë, që duke i shtuar edhe asistin e dhënë për Balajn tek goli i parë, por edhe lëvizshmërinë e madhe në fushën e lojës e bënë Uzunin që të cilësohet si lojtari më i mirë i ndeshjes.
Goli i vetem për kombëtaren e Kosovës shënua në minutën e 85-të me autor Muriqin, i cili shndërroi në gol një penallti të marrë nga vetë ai pas ndërhyrjes brenda zonës nga ana e Dokes që për arbitrin ishte e parregullt. Me atë që u dha në fushën e lojës, duhet thënë se kuqezinjtë e Edi Rejës e merituan fitoren, pasi përgjithësisht ishin më dominues të takimit. Pozitive për kombëtaren tonë në këtë ndeshje është konsideruar edhe aktivizimi i disa lojtarëve të rinjë, ndër të cilët spikatjen më të madhe e bëri mbrojtësi Çepele, që me vlerat e shfaqura në fushën e lojës konsiderohet një e ardhme e kombëtares sonë.
