Lajmi që qarkulloi rëndom gjatë orëve të mbrëmjes së martë për riveshjen kuqeblu të sulmuesit Sindrit Guri ka entuziasmuar me të drejtë mbarë opinionin sportiv shkodran, pasi realisht bëhet fjalë për një futbollist me shumë vlera që mund t’i bënte shumë punë Vllaznisë në këtë periudhë të dytë të sezonit futbollistik.
Po, a është i vertetë lajmi? Veriu Sport kontaktoi me drejtuesit e KF Vllaznia për të mësuar rreth vertetësisë zyrtare të lajmit në fjalë, por në mënyrë kategorike asnjëri prej tyre nuk e konfirmoi një gjë të tillë.
Ndërkohë, gjithjë për të qënë sa më korrekt dhe transparent me lexuesit, Veriu Sport kontaktoi me të afërmit e Gurit në Shkodër, dhe më pas edhe me vetë Sindrit Gurin, të cilët deklaruan se nuk ka asgjë reale në këtë mes.
“Mësova se është shkruar në media se sonte unë kam mbërritur në Shkodër dhe nesër do të firmosi me Vllazninë, por ju garantoj se në këtë mes nuk ka asgjë të vertetë”, thotë Guri, i cili sqaron se festën e ndërrimit të viteve e ka kaluar në Itali tek të afërmit e tij, dhe dje është larguar për të mbërritur në Ostendetë Belgjikës. Madje, ndër të tjera ai shton se ka pasur probleme me dëmtimin e një gishti të këmbës, i cili është duke u rikuperuar për të qënë gati pas pak ditësh për skuadrën e tij.
Gaspër MARKU
