Thursday, June 13, 2024

(Intervista) Sinani: Vllaznia e meritoi kualifikimin ndaj boshnjakëve, besoj se ka forca për të kaluar çdo kundërshtar

Lexo

Mes një grupi futbollistësh veteranë të Vllaznisë në vite që shijuan fitoren dhe kualifikimin ndaj boshnjakëve të Shiroki Brijeg ishte edhe ish bomberi kuqeblu, Vioresin Sinani. I kënaqur për kalimin në Turin e Dytë të Conference League, Sinani përgëzon skuadrën kuqeblu për lojën që zhvilloi në ndeshjen e dytë duke arritur përmbysjen e rezultatit, ndërkohë që beson se kjo Vllazni do të ketë një vazhdimësi pozitiv, pasi sipas tij, kjo skuadër është e denjë të kalojë çdo kundërshtar.

A e prisnit, duke u nisur nga ndeshja e parë, që Vllaznia të kualifikohej?

Padyshim që e prisja, pasi Vllaznia në ndeshjen e parë është penalizuar shumë nga arbitri. Në të kundërt, nuk do të humbte me atë rezultat. Në ndeshjen e kthimit, sidomos pjesa e dytë ishte spektakolare dhe tregoi se Vllazninë në atë takim e mundën Shiroki bashkë me arbitrin.

Si i përjetuat këto përballje kur dihet se Vllaznia kthehet në Europë pas 10 vitesh?

Me shumë emocione, sepse Vllaznia e vitit të fundit ka qenë shumë e bukur. Ka qenë mëkat që spektatorët të mos e shijonin në stadium atë ekip. Besoj se të gjithë janë kënaqur dhe emocionuar me Vllazninë në stadium kundër ekipit të Shirokit.

Ku ndryshoi, sipas jush, ekipi nga ndeshja e parë në atë që tregoi në sfidën e kthimit?

Në Shkodër kam parë një Vllazni me shumë grintë. Kam parë një Vllazni spektakolare, sidomos në pjesën e dytë. Kam parë një Vllazni sulmuese, siç e duan tifozët shkodranë.

A ju kishte marrë malli që të shikonit pas afro 18 muajsh një entuziazëm të tillë në “Loro Boriçi”?

Shumë! Por jo vetëm mua, por besoj të gjithë shkodranët. Në Shkodër e dashurojnë futbollin dhe emocionet ishin fantastike. Vllaznia ka bërë një mrekulli, pasi ta përmbysësh rezultatin nga 3 me 1, nuk është e lehtë.

Ka forcë kjo skuadër që të vazhdojë edhe më tej në këtë kompeticion?

Pse jo?! Do të luajmë kundër një ekipi qipriot, që jam i bindur se me besim e entuziazëm mund t’ia dalim. Ndeshja e dytë është në Shkodër dhe me publikun shkodran ne krahë, futbollistët e dinë se mund të arrijnë çdo rezultat.

Duke u nisur nga kundërshtari, a mund të jetë, sipas jush, një raund i kalueshëm?

Po, me plot gojën unë besoj se Vllaznia ka forca ta kalojë këtë kundërshtar. E them këtë sepse Vllaznia e sotme ka fituar besim e siguri dhe nuk e tremb askush.

Ku duhet të ndërhyjë, sipas jush, Vllaznia në merkato për të qenë sërish pretendente edhe në sezonin e ardhshëm?

Mendoj se përveç një sulmuesi, që do duhet pasi sezoni është i gjatë, në repartet e tjera e shoh një skuadër të kompletuar, pa shumë nevoja për ndërhyrje.

ADMIR URUÇI

- Advertisement -spot_img

PËRGJIGJU

Ju lutemi shkruani komentin tuaj!
Ju lutem shkruani emrin tuaj këtu

Të fundit

- Advertisement -spot_img