Kuqeblutë janë gati për sfidën e parë europiane, atë që do të luhet mbrëmjen e së enjtes në stadiumin 18,000-vendësh “Uindsor Park”, që shërben edhe si stadiumi kombëtar i Irlandës së Veriut mes skuadrës vendase Linfield FC dhe Vllaznisë së Shkodrës.
Ashtu siç e kishte planifikuar më herët, tekniku kuqeblu, Migen Memelli, ka preferuar që seancën e fundit stërvitore të kësaj pragndeshje ta zhvillojë në stadiumin “Loro Boriçi” dhe me dyer të mbyllura, pa praninë e mediave si dhe tifozëve që për hirë të së vertetes e kanë shoqëruar skuadrën gjatë të gjithë ditëve stërvitore në Shkodër, madje duke udhëtuar edhe në Bosnje për takimet miqësore.
Gjatë kësaj seancë, Memelli së bashku me kolegët e tij të stafit teknik ka aplikuar gjithçka ka projektuar për të shpalosur në duelin e parë të turit të parë të “Uefa Europa Conference League”.
Krahas strategjisë taktike që skuadra tashmë e ka të qartë se si do të luajnë në transfertën verioirlandeze, me interes në këtë seancë ka pasur projekti për lojtarët që do të hidhen në fushë nga minuta e parë.
Në këtë aspekt, pak a shumë tekniku Memelli e ka të qartë se cilët futbollistë do ta nisin ndeshjen nga minuta e parë, dhe bazuar edhe në atë që ka aplikuar në dy-tre seancat e fundit, Vllaznia pritet ta nisë ndeshjen me këtë formacion: Qarri, Juriç, Stojanoviç, Cheshmedjiev, Smajli, Hakaj, Boshnjaku, Alivoda, Mala, Balaj, Çoba.
Megjithatë, ashtu si edhe në testet e tjera të mëparshme, njëshi i pankinës kuqeblu ka bërë lëvizje të ndryshme gjatë minutave stërvitore duke lënë të kuptohet se në disa pozicione, edhe mund të ketë ndryshime në emra.
Kjo ishte seanca e fundit stërvitore në Shkodër, ndërkohë që e fundit fare përpara ndeshjes zyrtare të së enjtes, do të jetë seanca që do të konsumohet mbrëmjen e nesërme në tokën irlandezoveriore që do të zhvillohet në orën zyrtare të ndeshjes ku do të shikohet qartë vendimi që tekniku Memelli do të marrë pr formacionin e kuqebluve në sfidën, Linfield FC-Vllaznia.
Siç është bërë me dije edhe më herët, delegacioni sportiv shkodran do të lërë qytetin e Shkodrës në orën 09:30 të mëngjesit, ndërkohë që pas një fluturimi me avion Çarter, pritet të mbërrijë në orën 17:00 në Belfast të Irlandës së Veriut.
Në interes të opinionit që dëshiron ta ndjekë këtë ndeshje, bëjmë me dije se sfida e parë në Belfast, por edhe ajo e dytë e kthimit që do të luhet një javë më pas në stadiumim “Loro Boriçi” do të transmetohen drejtpërdrejt nga Supersport.
