Superpremio për fitore nga sponsori Xhaferi kuqeblu për kryesfidën, Partizani-Vllaznia

Vllaznisë nuk i kanë munguar premiot gjatë ndeshjeve të këtij kampionati, gjë që krahas të tjerave ka ndikuar jo pak dhe në atmosferen e skuadrës. Por, duket se këtë radhë, kur bëhet fjalë për kryendeshjen e javës së 17-të, atë mes Partizanit të vendit të dytë dhe Vllaznisë, sponsori kuqeblu Alban Xhaferi, por edhe mbështetës të tij kanë vendosur që shuma e shpërblimi në rast fitoreje të jetë e majme.  Kuqeblutë e drejtuar nga trajneri Brdariç kryesojnë kampionatin me 9 pikë më shumë se sa Partizani dhe Teuta që me pikë të barabarta ndajnë vendin e dytë dhe të tretë. Një rezultat pozitiv, që në këtë rast konsiderohet edhe barazimi, Vllaznia vazhdon të qëndrojë në pozita optimale në krahasim me ndjekësit e saj, ndaj edhe motivimi me anë të një premio speciale në këtë rast pritet të japë efektet e duhura tek skuadra. Akoma nuk dihet saktsisht shuma në fjalë, por vetë sponsori Alban Xhaferi ka deklaruar se një gjë e tillë do t’i deklarohet skuadrës në dhomat e zhveshjes pak minuta përpara se ajo të zbresë në fushën e lojës në orën 16.45 të së dielës.