Këshilli i Qarkut Shkodër ka zgjedhur klasiken e basketbollit shqiptar, Vllaznia-Tirana, takim i vlefshëm për gjysmëfinalen e dytë të Kampionatit Kombëtar, faza Play-Off, për të nderuar basketbollistë të brezave të ndryshëm që kanë kontribuar në arritjen e rezultateve pozitive.
Ceremonia përkatëse në nderim të këtyre figurave u organizua në pushimin e ndeshjes, Vllaznia-Tirana, ku në hapje të saj, kreu i Qarkut Shkodër, Edmond Ndou, njëherazi një dashamirës i flaktë i sportit, sidomos i futbollit duke ndjekur Vllazninë, brenda dhe jashtë rrethit, ka vlerësuar kontributin e dhënë nga personazhet e dekoruara.
Së bashku me Sekretarja e Përgjithshme të Këshillit të Qarkut Shkodër, Znj.Desara Rumija, dekorimi i parë me Çertifikatë “Mirënjohje” ka ardhur për ekipin Vllaznisë në Basketboll, i cili në sezonet 2013, 2014, 2015 ka fituar tre trofetë kombëtarë, titull që e ka tërhequr kapiteni i Vllaznisë, Robert Shestani.
Më pas me Çertifikatë “Falenderimi” janë nderuar, veterani i nderuar i basketbollit shkodran, kampion i Shqipërisë me Vllazninë e vitit 1967 si dhe trajner kampion me moshat, ish basketbollisti dhe trajneri kampion Bledar Gjeçaj, aktualisht trajner i Bashkimit të Prizrenit në Kosovë, titull që e tërhiqi nipi i tij Roni Gjeçaj(zv.trajner i Vllaznisë), ish kampioni i Vllaznisë Fatjon Taraboshi, i cili po kalon një gjendje të rënduar shëndetësore, titull të cilin e tërhoqi babai i tij Qemal Taraboshi së bashku me djalin e Fatjonit, presidenti i KB Vllaznia Sokol Dibra dhe kolegu i tij, Petrit Maho, si dhe ish basketbollisti dhe kapiteni i Vllaznisë kampione së viteve 2015, Ervin Berdica.
(Video) Ceremonia e organizuar nga Këshilli i Qarkut Shkodër në nderim të figurave të basketbollit shkodran.
Gaspër MARKU
