Vllaznia po shkëlqen në volejbollin e femrave të kategorisë së 18 vjeçareve. Në javën e pestë të Kampionatit Kombëtar U-18, skuadra kuqeblu ishte mysafire në kryeqytet ku u ndesh me ekipin vendas privat Tirana Kombi Volej. Ashtu si edhe në ndeshjet e javëve të mëparshme ku kanë dominuar mbi të gjitha ekipet e tjera, edhe në këtë ballafaqim volejbollistet shkodrane kanë qënë dominuese në fushën e lojës duke e fituar këtë sfidë me rezultatin e pastër 0 me 3.
21 me 25 në favor të Vllaznisë ka përfunduar seti i parë. Në setin e dytë ekipi vendas bën përpjekjet e duhura për të rivalizuar Vllazninë, por nuk shkon më tepër se sa pika e 23-të, sepse volejbollistet shkodrane tregohen të kujdesshme në pikët e fundit deçizive duke e mbyllur edhe setin e dytë përsëri me fitore, 23 me 25.
Rivalitet ka edhe në setin e tretë, por përsëri është Vllaznia që e mbyll edhe këtë set me fitore në shifrat, 22 me 25 duke fituar kështu të gjithë ndeshjen me fitore 0 me 3.
Kjo është fitorja e pestë radhazi e Vllaznisë U-18 që drejtohet nga stafi teknik, Eralda Dibra, Ferdinand Bardeli dhe Dorjan Tafa. Në pesë javë kampionat, volejbollistet 18 vjeçare të Vllaznisë kanë realizuar pesë fitore duke kryesuar kampionatin me 15 pikë të plota.
