Vllaznia-Erzeni 2-3(25-19, 25-21, 16-25, 19-25, 9-15)
Jo pak herë është thënë, por edhe është vertetuar se sporti i volejbollit është një sport i surprizave, apo i “pa besë” siç quhet rëndom në gjuhën sportive. Një gjë e tillë është reflektuar edhe në përballjen mes Vllaznisë dhe Erzenit në volejboll për meshkuj, takim ky i luajtur në pallatin e sportit “Qazim Dervishi” të qytetit të Shkodrës nën gjykimikn e dyshes Ardit Nurja dhe Endri Zguri.
Djemtë kuqeblu të drejtuar nga trajneri Artan Kalaja, bëjnë gjithçka mirë duke dominuar me lojë dhe rezultat në dy setet e parë. Nën dirigjimin e kapitenit të skuadrës, Nikolin Qafarena, duke pasur në fushë edhe kolegët e tjerë, Jukni, Çekini, Rrashketa, Taflaj, Lleshi, Jula, Talani, Pepaj, Curraj, Lugaj, Doniku, Vllaznia e fiton me meritë setin e parë 25-19.
Me të njëjtët parametra, vijon edhe seti i dytë, ku avantazhi mbahet në fuqi deri në shënimin e pikës së 25-të ndaj 21 të Erzenit. Vllaznia në avantazh 2 me 0 me sete, rezultat optimal për ta mbyllur të gjithë ndeshjen me fitore 3-0.
Por, siç thamë edhe më sipër, të papriturat e volejbollit, bëjnë që miqtë nga Shijaku të drejtuar nga trajneri Parit Uruçi shfaqen tejet të mobilizuar në setin e tretë, të cilin e fitojnë me lehtësi me shifrat 16-25.
Pritet një kthesë e Vllaznisë në setin e katërt për të mos lënë t’i ikë nga duart fitorja, por Erzeni nuk fal edhe në setin e dytë duke e fituar atë me shifrat, 19-25.
Barazim 2 me 2 me sete, duke e çuar ndeshjen me set final. Set, i cili flet përsëri në favor të miqve nga Shijaku, të cilët duke fituar atë 9 me 15, bëjnë përmbsyjen e madhe duke e fituar të gjithë ndeshjen me rezultatin 2 me 3.
Një fitore kjo rëndësishme për Erzenin duke e mbajtur në pozitat e skuadrave të kreut që synojnë titullin kampion, ndërkohë që për Vllazninë, humbja në fjalë është fatale, pasi zbeh në një farë mënyre mundësinë e përfshirjes në katër më të mirët e kampionatit. Aktualisht, kuqeblutë, renditen në vendin e pestë me 17 pikë, duke qënë tre pikë larg Skënderbeut të vendit të katërt, skuadrës ku luajnë tre shkodranët, Dibra, Drinazi dhe Preka.
