Ekipi i volejbollit meshkuj të Universitetit “Luigj Gurakuqi” të Shkodrës ka arritur një sukses histori. Djemtë e drejtuar nga trajneri Artan Kalaja, janë shpallur kampionë në Kampionatin Kombëtar të Universiteteve të Shqipërisë!
Pas ecurisë pozitive të tureve eleminatore, ekipi i volejbollit të Universitetit “Luigj Gurakuqi” të Shkodrës është kualifikuar në turin gjysmëfinal duke pasur përballë një nga skuadrat më të mira, siç është ajo e Universitetit të Sporteve në Tiranë.
Një gjysmëfinale shumë e fortë, plot rivalit dhe emocione, ku fituesi është vendosur me set final. Dhe ai është Universiteti i Shkodrës, i cili siguroi një vend në finale.
Finalja e madhe e këtij kampionati, që do të vendoste ekipin kampion për vitin 2024, është zhvilluar në mes ekipit të Universitetit “Luigj Gurakuqi” të Shkodrës dhe atij të Universitetit “Aleksandër Xhuvani” të Elbasanit.
Edhë në këtë përballje, studentët volejbollistë shkodranë: Sead Durro, Gersi Jula, Gilman Talani, Mario Lugaj, Mateo Qeseri, Juled Doniku, Sead Kopliku, Edmondo Kulla, të drejtuar me kompetencë nga trajneri dhe pedagogu i Universitetit “Luigj Gurakuqi” Artan Kalaja së bashku me kolegun e tij, pedagogun Fatjon Nurja, kanë demonstruar një nivel loje të larta duke mposhur në të gjitha drejtimet ekipin e Universitetit “Aleksandër Xhuvani” të Elbasanit.
Në këtë mënyrë, ekipi i Universitetit “Luigj Gurakuqi” të Shkodrës është shpallur kampion duke fituar trofeun e Kampionatit! Një tjetër sukses i univeritarëve shkodranë ka të bëjë edhe me sportistin e tyre, Gersi Jula, i cili u shpall sportisti më i mirë i aktivitetit, duke treguar talent dhe përkushtim të jashtëzakonshëm.
Një sukses ky i dyfishtë për universitarët shkodranë, çka tregon për punën mjaft të mirë që bëhet në këtë universitet, dëshmi e angazhimit dhe shpirtit sportiv të studentëve të drejtuar nga pedagogët e tyre profesionistë.
(Video) Ceremonia e mbylljes së Kampionatit Kombëtar të volejbollit për Universitetet e Shqipërisë. Momenti i dorëzimit të trofeut për Universitetin e Shkodrës dhe lojtarit më të mirë, Gersi Jula.
