Vllaznia vijon përgatitjet në kampingun slloven të Mariborit, ndërkohë që në program janë edhe ndeshjet miqësore, të cilat konsiderohen shumë të vlefshme për teknikun Martini në testimin dhe përzgjedhjen e emrave të formacionit të parë që pritet të hedhë në fushën e lojës për ndeshjen zyrtare të 10 korrikut ndaj skuadrës letoneze BFC Daugavpils, e vlefshme për Konference Ligë.
Testimi i parë ishte pasditen e së martës, ku kuqeblutë u mundën nga FC Koper me rezultatin 5-3. Ndërkohë, në program janë edhe dy miqësore të tjera, të cilat janë planifikuar të luhen përballë skuadrave rumune.
E para, do të luhet sot duke nisur prej orës 17:00 ndaj UTA Arad (ROM), ndërkohë që përballja e dytë me skuadrat rumune dhe e treta gjatë fazës përgatitore në Slloveni, është planifikuar të luhet me datë 2 korrik ndaj Petrolul (Rumani).
