Vllaznia ka arritur të sigurojë kualifikimin në çerekfinalet e Kupës së Shqipërisë, pas një fitoreje të vështirë minimale 1-0 ndaj Pogradecit. Në një takim të luftuar deri në fund, skuadra e drejtuar nga trajneri Edi Martini tregoi durim dhe pjekuri për të marrë rezultatin e dëshiruar.
Pjesa e parë u karakterizua nga lojë e kujdesshme nga të dyja skuadrat, me raste të pakta shënimi dhe shumë duele në mesin e fushës. Pogradeci u shfaq i organizuar dhe kërkoi të surprizojë, ndërsa Vllaznia tentoi të ndërtojë lojën e saj, por pa arritur të gjejë hapësirat e nevojshme.
Në fraksionin e dytë të lojës, kuqeblutë rritën ritmin dhe ushtruan më shumë presion drejt portës kundërshtare. Goli i fitores erdhi në minutën e 84-t, kur Elmando Gjini u tregua i saktë me kokë pas një krosimi nga krahu, duke dërguar topin në rrjetë dhe duke shpërthyer festën e tifozëve shkodranë.
Ndeshja nuk kaloi pa tensione, sidomos në minutat e fundit, ku pati përplasje dhe nervozizëm mes lojtarëve, por rezultati mbeti i pandryshuar deri në vërshëllimën finale.
Me këtë fitore, Vllaznia avancon më tej në Kupën e Shqipërisë dhe vazhdon rrugëtimin drejt objektivit për të shkuar sa më larg në këtë kompeticion. Nga ana tjetër, Pogradeci e mbyll aventurën në Kupë dhe tashmë do të fokusohet plotësisht në ndeshjet e Kategorisë së Parë, me synimin për të përmbushur objektivat e sezonit.
