E luajtur në dytë ditë, e shtunë dhe e diele, java e 17-të e Kategorisë Superiore regjistroi rezultate interesante të cilat ndikuan edhe në renditjen e skuadrave në tabelën e klasifikimit. Barazimi 0-0 në ndeshjen Partizani-Vllaznia që ishte çifti i fundit i kësaj jave vazhdon ta pozicionojë Vllazninë në vendin e parë me 37 pikë duke arritur të mbajnë Partizanin, rivalin kryesor që e ndjekë në vendin e dytë me 28 pikë po me 9 pikë diferencë siç ishte pas javës së 17-të.
Fitorja e Laçit ndaj Teutës 1-0 bën që laçjanët të ndërrojnë vendet me durrsakët. Që të dy ekipet kanë kuotë të barabartë pikësh, nga 27, por golaverazhi më i mirë fikson Laçin në vendin e tretë dhe Teutën në të katërtin.
Debutimi me fitore i trajnerit Mirel Josa në stolin e Kukësit që shpartalloi Skenderbeun në transfertë 0 me 4, bën që Kukësi të jetë në vendin e pestë me 26 pikë, një më shumë se sa Tirana që fitoi po në transfertë me Apoloninë 0 me 1.
Fitorja e krutanëve ndaj Bylisit 1 me 0 me golin e Dacit shënuar në minutën e 51-të i jep një frymëmarrje Kastriotit duke e pozicionuar në vendin e shtatë me 21 pikë, ndërkohë që Bylis shkon në fund të renditijes me 12 pikë, po aq sa ka edhe Skenderbeu i nënti, ndërkohë që Apolonia mban vendin e tetë me 13 pikë duke formuar treshen e luftës për mbijetesë në kategorinë Superiore.