Akordi ishte arritur më parë mes palëve, tani vjen edhe prezantimi. Eneo Bitri është zyrtarisht pjesë e kampionëve në fuqi të Egnatias. Mbrojtësi beratas ofron kualitet dhe eksperiencë te kjo skuadër, që po përgatitet për aventurën europiane.
Njoftimi zyrtar i KF Egnatia
“Egnatia mirëpret një tjetër përforcim të rëndësishëm për sezonin e ri. Mbrojtësi Eneo Bitri i është bashkuar skuadrës dhe ka udhëtuar së bashku me ekipin drejt Bullgarisë, aty ku do të zhvillohet faza përgatitore. Me eksperiencën, cilësitë dhe karakterin e tij, Bitri vjen për të dhënë kontributin maksimal dhe për të ndihmuar ekipin në arritjen e objektivave të sezonit”, – shkruhet në njoftimin e klubit rrogozhinas. Të urojmë shumë suksese me fanellën bardhejeshile dhe sa më shumë momente të bukura së bashku!”
Nga Egnatia ka pasur ditët e fundit disa largime, ndërkohë që si përforcime janë prezantuar sulmuesi Jurgens Montenegro dhe mbrojtësi shkodran, Geralb Smajli. Bitri në Superiore ka spikatur me fanellën e Partizanit, ndërkohë që ka luajtur në disa kampionate të huaja, si Kazakistan, Çeki, Poloni, Norvegji dhe Hungari.
