Tre humbjet radhazi të Vllaznisë, me Dinamon për Kupë, si dhe Elbasanin e Bylisin për Kampionat, kanë krijuar një klimë aspak pozitive në kampin kuqeblu. Jo vetëm brenda Klubit të Futbollit Vllaznia, por më së shumtmi në radhët e tifozërisë shkodrane, e cila me të drejtë është ftohur jo pak me skuadrën e saj të zemrës.
Por, kampionati akoma nuk ka mbaruar, madje tashmë është sprinti final drejt realizimit të objektivit, që Vllaznia i ka vënë vetes për fitimin e titullit kampion.
Ndeshja e së mërkurës, Tirana-Vllaznia, takim i vlefshëm për javën e 35-të të Abissnet Superiore është momenti më i përshtatshëm për reflektimin e Vllaznisë.
Një klasike kjo e futbollit shqiptar që paraqet një interes maksimal për të dyja skuadrat, Tiranën që lufton për mbijetesë dhe Vllazninë e dyta në renditje e deklaruar si pretendime kryesore për fitimin e titullit kampion, ku lufta e fortë sportive dhe spektakli është i garantuar.
Dhe, për këtë, ditët e pasndeshjes me Bylisin janë shoqëruar me lajme të mira në kampin kuqeblu. Analiza me sy kritik e ndeshjes me ballshiotët, dhe përgatitja e skemave të pragndeshjes me Tiranën, kanë qënë në qëndër të vemendjes së skuadrës kuqeblu, prej së cilës presidenca me në krye Alban Xhaferin kërkon patjetër reflektim në fushën e lojës.
Një javë kjo që nisur nga sfida e vështërë që Elbasani kryesues ka në transfertë me Bylisin, me një fitore tre pikëshe ndaj Tiranës, Vllaznia shpreson të rikthehet në krye ta tabelës së klasifikimit për të mos e lëshuar më atë deri në mbyllje të dueleve të “Final 4”.
Krahas klasikes, Tirana-Vllaznia, e cila luhet në stadiumin “Selman Stërmasi” të kryeqytetit prej orës 16:00 të së mërkurës, në kalendarin e javës së 35-të janë edhe përballjet: Egnatia – Partizani, Flamurtari – Teuta, Bylis – AF Elbasani dhe Dinamo City – Vora, që të gjitha për tu luajtur në të njëjtën orë, 16:00.
