Esat Bushati, veterani i nderuar i futbollit shkodran dhe atij shqiptar, i cili ndërroi jetë një ditë më parë në moshën 97 vjeçar do të përcillet mesditen e së premtes, ora 12:00 për në banesen e fundit.
Në respekt të kësaj figure shumë të njohur dhe të respektuar në Shkodër dhe më gjërë, KF Vllaznia dhe Bashkia Shkodër kanë programuar organizimin e homazheve në hollin e stadiumit “Loro Boriçi” prej orës 10:00 deri në 12:00.
Ndërkohë, kreu i Bashkisë Shkodër, Benet Beci, përcjell mesazhin e tij ngushëllues për ndarjen nga jetë të Esat Bushatit, shoqëruar edhe me një foto me të realizuar gjatë një takimi të organizuar në zyrën e tij me veteranë të sportit shkodran, mes të cilëve ishe edhe vetë Esati.
“Futbolli shkodran humbi një nga emrat e tij të respektuar, Esat Bushatin, ish-futbollistin e Vllaznisë, Partizanit dhe Kombëtares shqiptare.
Një jetë e lidhur me futbollin dhe me fanellën kuqeblu, të cilën e veshi që prej vitit 1947.
Shkodra i ka të shtrenjtë njerëzit që kanë shkruar historinë e sportit të saj dhe Esat Bushati do të mbetet një prej tyre.
Ngushëllimet më të sinqerta familjes Bushati, të afërmve dhe gjithë familjes së madhe të futbollit shkodran.
U prehsh në paqe, Esat!”, shkruan kryebashkiaku shkodran Benet Beci.
