Shqipëri-Izrael 0-1(Shënues: Gloukh 73’)
Formacioni i Kombëtares kuqezi: Alen Sherri (GK), Elseid Hysaj, Arlind Ajeti, Berat Gjimshiti (C), Mario Mitaj, Ylber Ramadani, Qazim Laçi, Kristjan Asllani, Anis Mehmeti, Arbër Hoxha, Armando Broja. Trajner: Rolando Maran
Kombëtarja shqiptare zhvilloi mbrëmjen e sotme ndeshjen e parë miqësore të muajit qershor, duke u përballur me Izraelin në stadiumin “Air Albania”. Pavarësisht paraqitjes pozitive dhe rasteve të krijuara gjatë takimit, kuqezinjtë u mposhtën minimalisht me rezultatin 0-1.
Trajneri Rolando Maran e nisi sfidën me këtë formacion titullar: Alen Sherri (GK), Elseid Hysaj, Arlind Ajeti, Berat Gjimshiti (C), Mario Mitaj, Ylber Ramadani, Qazim Laçi, Kristjan Asllani, Anis Mehmeti, Arbër Hoxha dhe Armando Broja.
Shqipëria e nisi ndeshjen me intensitet të lartë dhe që në minutat e para kërkoi të vendoste presion ndaj kundërshtarit. Rasti më i pastër i pjesës së parë erdhi në minutën e 10-të, kur Elseid Hysaj krosoi saktë nga krahu i djathtë, por Anis Mehmeti, i vetëm përballë portës, nuk arriti të konkretizonte.
Kuqezinjtë vazhduan të kërkonin golin edhe më pas me Kristjan Asllanin, Arbër Hoxhën dhe sërish Mehmetin, ndërsa në minutën e 43-të Armando Broja provoi pas një aksioni individual, por tentativa e tij u ndal nga mbrojtja izraelite.
Edhe në pjesën e dytë Shqipëria krijoi raste të mira. Në minutën e 54-t Ramadani provoi nga distanca, ndërsa pak minuta më vonë Asllani tentoi sërish nga jashtë zone. Një nga momentet më të rrezikshme për kuqezinjtë erdhi në minutën e 67-të, kur një aksion i Arbër Hoxhës nga krahu i majtë detyroi mbrojtjen izraelite të devijonte topin pranë autogolit.
Nga ana tjetër, Alen Sherri u shfaq vendimtar në disa raste, duke mbajtur në lojë Shqipërinë me pritje të rëndësishme ndaj Solomon dhe Abed.
Goli i vetëm i takimit u shënua në minutën e 73-të nga Gloukh, i cili finalizoi një kundërsulm të shpejtë të miqve. Në minutat e mbetura kuqezinjtë kërkuan të rikthenin ekuilibrat, ndërsa trajneri Maran aktivizoi edhe Juljan Shehun, Nedim Bajramin, Mirlind Dakun, Adrion Pajazitin, Andi Hadrojn, Luis Hasën dhe Cristian Shpendin.
Pavarësisht humbjes minimale, ndeshja i shërbeu stafit teknik për të testuar skuadrën dhe për të vlerësuar alternativat në prag të angazhimeve të ardhshme të Kombëtares.
Kuqezinjtë do të vijojnë përgatitjet për ndeshjen e dytë miqësore të këtij grumbullimi, ku do të përballen me Luksemburgun ditën e shtunë, më 6 qershor, në orën 20:00, në “Air Albania”.
