Finalja e FSHF Cup, Panthers Shkodër – Hidro Alfa 4-0
(Shënues: Albert Mila, Besfort Gjoklaj, Irlind Zaja, Valdano Nimani)
Formacioni i MFC Panthers: Fatos Behari, Ismirald Osmani, Brendon Smajli, Oltion Drabeja, Adi Mehja, Semir Gokaj, Albert Mila, Denis Çokaj, Besfort Gjoklaj(U aktivizuan: Fatjon Nutaj, Valdano Nimani, Irlind Zaja, Asar Bashi, Redi Osmanaga). Trajner: Fatmir Axhani. President: Ergin Axhani.
Kur mori përsipër angazhimin e tij në futbollin amator 9×9 në krye të ekipit MFC Panthers Shkodra, Ergin Axhani, kishte edhe një bast me veten, por edhe me opinionin sportiv, sidomos atë shkodran. Bazuar në traditen dhe elementin cilësor të atij grupi që kishte grumbulluar rreth vetes, Ergini, i cili fillimisht ishte edhe vetë titullar në fushën e lojës, por që më pas si rezultat i një dëmtimi që kishte rrugës vazhdoi ta mbështesë skuadrën nga pankina, besonte shumë fitimin e trofeut.
Autoritetin kësaj skuadre ia shton edhe më shumë edhe një emër shumë i njohur i futbollit shkodran, Fatmir Axhani, babai i Presidentit Ergin Axhani, i cili merr përsipër drejtimin e MFC Panthers. Kështu, që të dy së bashku, babë dhe djalë, duke pasur në dispozicion djemtë e talentuar që kanë në skuadër, marrin përsipër vazhdimësinë pozitive të MFC Panthers Shkodra.
Paraqitje fantastike në ndeshjet e kampionatit duke qënë një pretendent shumë dinjitoz për fitimin e titullit kampion, i cili fatkeqësisht, për faktorë të ndryshëm, pse jo edhe nga arbitrimi, nuk u arrit. Por, megjithatë, MFC Panthers Shkodra nuk dorëzohet dhe lufton fort për të fituar trofeun tjetër, i dyti për nga rëndësia e këtij sezoni, FSHF Cup.
Pasi kalon me shumë sukses turet eleminatore, në futbollin 9×9, MFC Panthers Shkodra mbërrin në finalen e madhe të edicionit të parë të këtij kompeticioni duke pasur përballë Hidro Alfa, ndeshje kjo e zhvilluar në fushën e Shtëpisë së Futbollit.
Një finale kjo e dominuar tërësisht nga djemtë shkodranë, të cilët dhurojnë spektakël në fushën e lojës. Si rezultat i presionit në fushën kundërshtare, vijnë edhe golat për MFC Panthers Shkodra, njëri më i bukur se tjetri.
Rrjeta e parë për ekipin shkodran realizohet nga Albert Mila, avantazh ky që mbyllë pjesën e parë me rezultatin 0 me 1 për MFC Panthers udhëtuese. Ndërsa, në pjesën e dytë avantazhi thellohet me golat e tjerë të realizuar nga Besford Gjoklaj, Irlind Zaja dhe Valdano Nimani, duke fiksuar shifrat përfundimtare në rezultatin 4-0.
Një rezultat ky që zyrtarizon ekipin MFC Panthers Shkodra fitues të FSHF Cup për futbollin amator 9×9 në edicionin e parë të këtij kompeticioni 2022/2023.
Në përfundim të ndeshjes u zhvillua edhe ceremonia e mbylljes së aktivitetit ku Drejtori i Futbollit Amator në FSHF, Jurgen Demneri dhe specialisti i këtij sektori, Igli Mumajesi, i dorëzuan kapitenit shkodran, Semir Gogaj trofeun dhe medaljet përkatëse FSHF Cup.
Mbyllet kështu ky edicion me një sukses të merituar të skuadrës shkodrane, MFC Panthers, fitimin e trofeut FSHF Cup. Realizimi i objektivit për fitimin e njërit prej objektivave është padyshim një nxitje për presidentin Ergin Axhani, i cili mbi bazën e përvojës së fituar në këtë edicion të parë ka marrë përsipër të dhurojë surpriza të tjera në vazhdim . Që do të thotë, se krahas pjesëmarrjes në këtë disiplinë, Panthers Shkodra është në process organizimi për të konkuruar denjësisht në kategoritë e larta të futbollit shqiptar.
(Video) Pamje nga ndeshja finale e FSHF Cup, MFC Panthers Shkodra-Hidro Alfa 4-0 dhe ceremonia e mbylljes).
Gaspër MARKU
