Shoqata e Mundjes Vllaznia e ka kthyer në një traditë të veten organizimin e takimeve të herëpashershme në gjarjeve dhe datave festive. I tillë ishte edhe takimi i sotëm, i cili iu dedikua ish mundësit të njohur shkodran, Edmond Çupi, i cili pas një karriere të suksesshme me Vllazninë, jeton prej vitesh në emigracion.
Figurat e njohura të mundjes shkodrane në vite, Eliaz Guri, Pal Marku, Dilaver Cufi, Besim Pirani, Besnik Rama, Ismet Guri, Lutfi Drini, Kolë Spasari, Skender Mushtaraku, Dush Lluja, së bashku me përfaqësuesit e Shoqatës së veteranëve të mundjes të ardhur nga Tirana, sekretari, Xhelil Cibaku dhe Zef Çupi, patën kënaqësinë të kalojnë një dreke festive me kolegun e tyre të tapetit të mundjes, Edmond Çupi, i cili rikthehet në Shkodër pas një periudhe të gjatë emigracioni.
Bisedat mes njëri-tjetrit, sjellja në vemendje e kujtimeve të atyre viteve të karrieres sportive në ekipin e mundjes Vllaznia, foto, batuta, humor dhë këngë, shoqëroj takimin e tyre përmbi dy orë, në një takim ndryshe, i cili sipas vetë veteranëve të mundjes do të përsëritet edhe herë të tjera duke mbajtur të bashkuar veteranët e mundjes shkodrane, ashtu si dikur kur bënin sport.
Video: Në emër të shoqatës së veteranëve të mundjes shkodrane dhe asaj shqiptare, përshëndetën, Eliaz Guri dhe Xhelil Cibaku. Fotot dhe video nga Agron Isufi
