Kuqeblutë e Vllaznisë janë në ditët e fundit të përgatitjeve për ndeshjen e parë europiane të Konferencë Ligë me Linfield të Irlandës së Veriut. Skuadra e drejtuar nga trajneri Migen Memelli, pasditen e sotme është stërvitur në tapetin e gjelbërt të stadiumit “Loro Boriçi”.
Seancë kjo e parafundit stërvitore në prag të ndeshjes së parë zyrtare e Konferencë Ligë ndaj Linfield. Sipas programit, nesër(e martë) do të ketë edhe një seancë tjetër të fundit, ndërkohë që të mërkurën do të niset drejt Belfasit.
Ndërkohë, që rradhët e futbollistëve dhe stafit teknik vërehet optimizëm për një rezultat pozitiv në këtë takim të parë të vlefshëm për “UEFA Europa Conference League”, stafi teknik zyrtarizoi mbrëmjen e sotme ndeshjen miqësore me skuadrën e Superligës malazeze, Buduçnost.
Një miqësore kjo që është planifikuar të luhet me datë 15 korrik 2023, pikërisht dy ditë pas ndeshjes zyrtare të Konferencë Ligë që luhet mbrëmjen e 13 korrikut në Belfast.
Që do të thotë, më saktësisht, se pas ndeshjes Linfield FC-Vllaznia, kuqeblutë do të fluturojnë direkt me avion çarter nga Irlanda e Veriut e largët për të mbërritur mëngjesin e 14 korrikut në aeroportin “Nënë Tereza” të Rinasit, dhe menjëherë të nesërmen në mbrëmje, ora 20:00 të 15 korrikut do të luajë miqësoren me malazezët e Buduçnostit.
Një program disi i ngjeshur, kur kemi parasysh ngarkesen dhe lodhjen fizike që merr skuadra nga përballja e parë në transfertën e largët e Irlandës së Veriut.
Megjithatë, në fokusin e stafit teknik të kuqebluve, kjo miqësore është menduar dhe ideuar në një këndvështrim tjetër duke e trajtuar si një shkrythje dhe një testim tjetër të fundit të skuadrës për ndeshjen e kthimit të 20 korrikut ndaj verioirlandezëve të Linfield në stadiumin “Loro Boriçi” të Shkodrës.
