Edhe një seancë stërvitore ka Vllaznia në dispozicion në prag të supersfidës me Tiranën. Ajo do të zhvillohet mbrëmjen e sotme në Durrës, aty ku është duke u stervitur prej tre ditësh skuadra kuqeblu.
Një grumbullim ky në bregdetin durrsak që duket se i ka vlejtur shumë futbollistëve për të marrë formën e duhur sportive. Më së shumtmi, kuqeblutë i gëzohen rikuperimit të titullarëve që gjatë javës kanë shfaqur problem fizike.
Dhe, ndër të tjera, merita këtu shkon për stafin mjekësor, i cili ka bërë të pamundurën që katërshja, Aralica, Jonuzi, Gjurgjeviç dhe Hakaj t’i bashkohet grupit të parë gjatë dy seancave të fundit stervitore.
Me gatishmërinë e katërshes në fjalë, teknikut Brdariç i shtohen alternativat e duhura për fiksimin e njëmbëdhjetëshit të parë që do të hedhë në fushë mbrëmjen e së shtunës kundër Tiranës.
Megjithatë, edhe pse realisht konsiderohet një gjë shumë pozitive, rivaliteti i madh që ekziston në skuadër për një vend titullari ia shton paksa sikletet teknikut kuqeblu.
Më së shumtmi, gara për një vend titullari në këtë pragndeshje vëheret në repartin e sulmit, por edhe e mesfushës. Kruja dhe Çoa që luajtën titullarë në miqësoren me pukjanët e kërkojnë sërishni një gjë të tillë, dhe nga sa bëhet e ditur, të paktën për njërin prej tyre, Brdariç shtë duke e menduar seriozisht një gjë të tillë.
Gjithësesi, me shumë mundësi, dilemave që në lidhje me këtë pikë, Brdariç së bashku me kolegët e tij të stafit teknik pritet t’u japë fund në seancën e fundit anti-Tirana.
