Sezoni i ri sportiv për sportin e volejbollit nis këtë fundjavë me ndeshjet e Kupës së Federatës. Sipas formulës së miratuar nga strukturat e FSHV–së, kjo veprimtari, vë përballë njëra-tjetrës ekipet që e mbyllën sezonin e shkuar të rregullt në 4 vendet e para të renditjes.
Që do thotë, bazuar në renditjet zyrtare, këtë të drejtë e kanë fituar Skënderbeu, Partizani, Tirana dhe Barleti Volley për femra dhe nga ana tjetër për meshkuj, janë Tirana, Partizani, Erzeni, Vllaznia. Ndërkohë, që ekipi i femrave të Vllaznisë nuk do të ketë mundësi të konkurojë në këtë kompeticion, por që nga ana tjetër po përgatitet intensivisht për betejen e kampionatit, ku edhe objektivat e këtij sezoni janë optimale për fitimin e titullit kampion, ekipi i meshkujve do të luajë gjysëmfinalen me ekipin e Tiranës.
Bazuar në situatën më të fundit, gjendja tek skuadra e meshkujve që drejtohet nga trajneri Artan Kalaja nuk paraqitet fort e mirë, pasi nga radhët e saj ka pasur largime titullarësh. Megjithatë, kuqeblutë do ta shfrytëzojnë pjesëmarrjen në ndeshjet e Kupës si test kolaudues për ndeshjet e kampionatit.
Kalendari i ndeshjeve të Kupës së Federatës
Gjysëmfinalet-Femra (23 shtator)
Skënderbeu – Partizani, 17:00/Tirana – Barleti Volley, 19:00.
Gjysëmfinalet-Meshkuj (24 shtator)
Tirana – Vllaznia, 18:00/Erzeni – Partizani, 19:00
Fituesit e dy dueleve gjysëmfinale do të luajnë takimet finale ditën e dielë, në Sallën Sportive të Lojërave me Dorë në Farkë. Finalja e femrave do të jetë në orën 16:30 dhe ajo e meshkujve në orën 19:00.
